sinursuran-banner-sqSinursuranNi Jobert M. Pacnis

PM SENT?

Kadawyan a sungbat dagiti online seller no damagen ti presio dagiti tagilakoda. Saanda a diretsa nga ibaga no sagmamano. I-private message-da.

Makapasuron, di kadi?

Ngem apay a kasta ti sungbatda?

Segun met laeng kadagiti posteda iti social media, ar-aramidenda dayta tapno saan a maammuan dagiti dadduma nga online seller. Ta addada kano dagiti naayat a mangsukit (mangsulot) iti prospected buyer. No iposteda, pagarigan a P100 ti bayad ti produkto, addada mangi-PM iti dayta a buyer ket ibagada a nalaklaka ti presioda.

Di kad’ awan manen ti namnamaenda a kostumer.

Bassit la idi ti adda iti online business. Ngem iti idadateng ti agdama a sangsanguentayo a pandemia, immadu nga immadu ti bilangda.

No ngarud labsen ti agsao, ngannganin sa aminen a pagayam iti Facebook ket online seller-dan. Saan laengen a kadagiti sikat a Lazada ken Shoppee ken kaarngida ti mabalin a pakagatangan kadagiti masapsapul iti biag a saanen a rumbeng pay a rummuar iti pagtaengan tapno makaliklik iti bayrus.

Kanigid-kanawan itan dagiti online seller. Manipud iti simple a kasapulan iti bagi, iti kusina ken iti pagtaengan, mabalinen nga orderen nga online. Kinapudnona, uray man ketdi no bugguong.

Ken uray payen dagiti masapspaul iti simple a panaggarden. Manipud kadagiti masapul a bukel, (napabaknang) daga ken paso.

No apay a kasta la unayen ti panagdur-as ti online selling, dakkel ngamin ti nam-ay nga itden daytoy iti tunggal maysa. Saanen a masapul ti rummuar pay (aglalo ita a panawen ti panagraira ti bayrus). Yuray laengen iti mismo a ridaw ti pagtaengan dagiti inorder. Bayadanto lattan agraman ti shipping fee-na.

Shipping fee wenno SF. Ditoy met ita ti yan ti parikut no dadduma. Nanginngina pay ngem iti produkto no maminsan.

A ditay met mapabasol dagitoy nga online seller, aglalo dagiti dadakkel a kompania. Masapul a subbotenda ti gastosda a mangidanon iti produkto. Ken adda tao a suelduanda a tao.

Maysa pay a pakadismayaan iti online selling ti kalidad ti produkto. Kitkitaen nga original ti naipost a produkto, ngem dagitinto metten imitation wenno peke ti mapasangpet nga inorder.

Pagdaksanna, narigaten nga ireklamo daytoy no naited ti bayad ken nakapanawen ti nagdeliber. Isu a balakad a kanayon dagiti eksperto, kitaen nga umuna ti produkto inton mayawat sakbay a bayadan. Nasaysayaat ti agsigurado ngem ti agkudkudto laeng iti di met nagatel nga ulo.

Subliantayo dagiti online seller a mabalin a gayyem wenno am-ammotayo a personal. Immaduda a husto itoy a panawen ti pandemia. Uray pay ngarud dagiti dati nga agop-opisina, dagiti mannursuro, simrekda metten nga online seller.

Masapul a mangged, kunada man. Aglalo ta narigat ti panagbiag. Awan magteng no agdikkumer laeng iti suli. Mayannatup a panunoten no kasano nga adda mapastrek para kadagiti umad-adu a kasapulan iti biag.

No kitaentayo, nabaked met dayta rasonda no apay a PM Sent pay laeng no damagen ti presio ti tagilakoda.

Ngem segun iti post ti Department of Trade and Industry (DTI) Sultan Kudarat, maipawil daytoy iti linteg. Masapul a maibatad online ti presio dagiti tagilako.

A sinarurongan ni DTI Sec. Ramon Lopez. Iti kano babaen ti Price Tag Law, rumbeng laeng nga ilanad ti presio ti maysa a produkto. Agmulta iti P5,000 agingga iti P1,000,000 ti asino man nga aglabsing itoy.  

Ti presio, masapul pay nga iti Pesos. Saan nga iti sabali a yunit ti kuarta. Panaglabsing met daytoy.

Ngem dagus a linawlawagan ni Lopez a dagiti laeng basic needs ti masapul nga adda price tag-na. Saan a mapuersa ti opisinada a paikkan iti presio dagiti saan a karaman itoy. Intedna nga ehemplo ti presio ti bisekleta a maib-ibus ita gapu iti panagkasapulan iti transportasion.

Malaksid a saan a basic needs daytoy, agduduma pay ti modelona. Ngarud, saan nga agpapada ti presio. Saan a kontrolado ti maseknan nga ahensia.

Kasta kano met laeng dagiti mailaklako iti online. Narigat a makontrol ti presio.

Mangnamnamatayo lattan iti nasalun-at a kompetision iti online tapno saan a kasta la unay ti itatayok ti presio dagiti masapultayo a produkto.

Ta iti udina, dakkel ti papel dagiti online sellers. Aglalo, kas nasaon, ita a panawen ti pandemia.

Dakkel met ti maitultulongda iti ekonomia, aglalo kadagiti rehistrado a dadakkel a kompania.

Ket itay laeng nabiit, nagbalin met nabara nga isyu ti maysa a panggep dagiti agpampanday ti linteg ti mangbuis kadagiti amin nga online sellers. Kas maitutop kano iti ania man a klase ti negosio. Tapno agbalin daytoy a legal, rumbeng laeng nga agbayad iti buis. Mairehistro, kasta.

A siempre, saan a kinanunongan dagiti maseknan. Bassit-usit la kano ti dumdumket kadakuada, mabuisan pay? Kakaisuna laeng a pangalaanda iti pagbiagda/pangbiagda iti pamiliada.

Saan a panangkanunong daytoy iti kayat dagiti agpampanday ti linteg. Ngem panagkitatayo, panawen siguro metten a mabuisan dagitoy nga online sellers.

Kitaentayo dagiti aglaklako iti tiendaan. Uray bassit laeng a natnateng ti ilakoda, adda dita agarkabalada tapno laeng makapaglakoda. Saanda nga agrekreklamo.

Ket saan ngata a maitutop met a mabuisan dagitoy nga online sellers? Aklonentayo, dakkel ti ganganarenda. Saan a pudno a bassit-usit laeng. Ta no kasta, saan koman a kasta la unayen ti panagadu ti bilangda.

Adu siguro dagiti am-ammotayo nga online sellers. Ket makitatayo a pudno daytoy. Isu a nasaotayo a panawenen a mabuisan met ti “negosioda.”

Kas met laeng iti ania man a negosio, no awan permitna, ilegal. Saan a rumbeng nga agoperasion. Kas iti mapaspasamak iti maysa estasion ti telebision, napasardeng ta nagpason ti prangkisana.

Ken tapno nasalsalun-at nga agpayso ti kompetision, masapul a maibaskag iti onlayn ti napaypayso a presio. Ta kitaen laengen dagiti dua a nadakamat a dadakkel a kompania nga aglaklako iti onlayn, nanginngina ti tagilako ti maysa ngem apay nga adda latta met gumatang itoy?

Isu a maiparit koman a maminpinsan dayta PM Sent nga agus-uso ita. Ti laeng met masapul, agbalin koma dagiti amin nga online sellers a napudno iti bagbagida. Saandan a padaksen pay dagiti kapatadanda ta maymaysa laeng met ti dalan a daldaliasatenda. Kasta ti nasalun-at a (panag)negosio.