Footer

PMA valedictorian, pimmusayen

STO. DOMINGO, Ilocos Sur – Adu a kalugaran ti nagbalediktorian iti Philippine Military Academy ti naldaangan ken nasayangan iti nasapa nga ipupusay daytoy agtutubo a patanor daytoy nga ili.

Kalpasan ti napaut a pannakaidalitna iti sakitna a cancer of the liver, pimmusay ni Air Force Lieutenant Ariel Toledo, tubo iti Brgy. Pussuac ditoy nga ili itay Sept. 5.

“Malidayankami iti nasapa nga ipupusay ti kalugaranmi a ni Lt. Ariel Toledo gapu ta ammomi nga agbalin a heneral iti masakbayan ken ammomi a mannakitinnulong ken adu ti magapuananna para iti ili ti Sto. Domingo ken iti gobierno,” kinuna ni Mayor Floro “Butch” Tadena.

    “Iti ipapatayna, nakeltay ti masirmata a naraniag a bituenna iti Air Force,” kinuna ti maysa a negosiante a residente ditoy idinto nga innayonna a ninamnamana nga agbalinto ni Toledo a maysa a heneral iti militar.

Kinuna met ti sabali a residente ditoy a pinullonto a tawen ti palabsen santo makapatanor manen ti Sto. Domingo iti agbalediktorian iti PMA.

Uray dagiti kaduana iti Air Force, dinayawda ti  tibker ni Toledo a nakibakal iti sakitna.

“Agingga iti maudi a gundaway, linabanan ni Toledo ti sakitna gapu iti tarigagayna nga agbiag ket gapu iti dayta, saluduak,” kinuna ti maysa nga opisialna.

Ni Toledo ti nangawat iti kangatuan a pammadayaw iti klaseda iti panagturpos ti Mandala (Mandirigmang Dangal ng Lahi) Class idi 2006.

Pinilina ti Air Force a pagserbian ngem sumagmamano a bulan a panagserbina ditoy, naduktalan nga adda sakitna a kanser iti liver a puon ti nakayospitalanna iti nabayag.

Ni Toledo ti maikalima a natay manipud iti Mandala class.

Tallo a kinaklaseanna ti nairaman kadagiti sangapulo ket uppat a Marines a napapatay iti panagrupak ti tropa ti turay ken dagiti Abu Sayyaf idi Agosto 18 a pakairamanan da Marine Lieutenants Eugene Machieste Piñera, Roldan Samera ken Ermin Soloren idinto a natay ni Army Lieut. Mark Evan Onrubia iti rupak idi rimmaut dagiti komunista a gerilia iti maysa nga ili iti Abra idi Mayo.

Idi katurturpos ni Toledo, pinadayawan ti gobierno munisipal ditoy gapu iti panangitag-ayna iti ilina iti panagbalinna a balediktorian iti PMA.

Naimassayag ti bangkay ni Toledo iti Philippine Air Force mortuary iti tallo nga aldaw sa naiyawid ditoy itay Sabado .

Iti ilina ti dinawat ni Toledo a pakaitabonanna, segun iti gayyemna a babai, ni Margaret Encarnacion.#