Editorial: PNP profiling kadagiti mangisursuro a miembro ti ACT | Tawid News Magazine - Weekly Ilocos News 📰

PNP profiling kadagiti mangisursuro a miembro ti ACT

NAGTIPON a pannakakellaat ken panagdanag ti marikna dagiti mangisursuro iti Department of Education (DepEd) nagruna dagiti kameng ti Alliance of Concerned Teachers (ACT) kalpasan a rimsua ti kontrobersia a panangisaysayangkat ti Philippine National Police iti profiling wenno panangammo ti kinatao kadagiti kameng iti daytoy progresibo a grupo.

Rimsua ti isyu kalpasan nga adda naiparuar a surat ti Schools Division Office iti Manila a naiturong kadagiti mangidaulo kadagiti pangpubliko a pagadalan iti siudad mainaig iti panangiyendorsoda iti memorandum ti PNP maipapan iti panangipasada iti inventory dagiti mangisursuro a kameng ti ACT kadagiti imatonanda nga eskuela. Pinaibabawi ti DepEd National Capital Region Office ti surat ti SDO gapu iti mandar manipud iti Central Office.

Naalarma dagiti mangisursuro iti DepEd nangruna iti Metro Manila ken dagiti probinsia ken lugar nga adda dagiti memorandum nga imparuar ti PNP mainaig iti ACT members inventory. Dinepensaan met ni DepEd Secretary Leonor Briones dagiti mangisursuro nga addaanda iti kalintegan a mangilimed wenno saan a mangiparuar kadagiti personal nga inpormasion iti kinataoda kas sagudayen iti Data Privacy Act of 2012.

Inaklon ni Philipine National Police Chief Director General Oscar Albayalde ti kaadda ti gannuat a profiling kadagiti mangisursuro a miembro ti ACT mainaig iti plano a manggibus ti insurhensia iti Pilipinas inton malpas ti termino ni Presidente Rodrigo Duterte. Impalgakna a kayat a duktalen ti PNP dagiti mangisursuro a mangsupsuporta iti armado a rebelion.

Mabigbig ti ACT kas progresibo a grupo dagiti mangisursuro iti gobierno a mangiruprupir ti karbengan dagiti agpapaay iti sektor ti edukasion. Nagsaknap dagiti miembro ti ACT iti Metro Manila, Bulacan, Rizal, Laguna, Quezon, Camarines Sur, Agusan del Sur ken dadduma pay a probinsia. Ti laeng ACT ti gunglo dagiti mangisursuro a makinegnegosasion iti gobierno mainaig iti sueldo ken benepisio dagiti mangisursuro. Addaan pay ti ACT iti dua a partylist representatives iti House of Representatives a kritiko ti administrasion mainaig kadagiti adu nga isyu iti pagilian

Nagtaripnongen da Sec. Briones, Interior and Local Government Secretary Eduardo Año, ken pannakabagi ti ACT maipapan ti gannuat ti PNP nga ACT members profiling. Ngem iti laksid dayta, agtultuloy ti panagamak dagiti mangisursuro nangruna dagiti miembro ti ACT iti gannuat ti PNP a mangammo kadagiti personal nga impormasion iti kinataoda.

Ibilang dagiti mangisursuro kadagiti pangpubliko a pagadalan ken dagiti right advocates a ti gannuat ti PNP a profiling kadagiti mangisursuro ti DepEd ken maibilang nga “invasion of privacy” ken rabsutenna ti kalinteganda kas sagudayen iti probision ti 1987 Constitution. Agamakda a napeggad ti pannakaurnong dagiti pribado nga impormasion mainaig iti personal a biagda, ken maited kadagiti opisial ti agdama nga administrasion, ket matratoda a sumupsuporta iti armado a rebellion a pagpeggadan ti panagbiagda.

Masdaaw dagiti adu a retirado nga opisial ti PNP ken Armed Forces of the Philippines a nagpaay kadagiti nagduduma nga intelligence units iti wagas a pannakaisayangkat ti profiling kadagiti mangisursuro iti DepEd a kameng ti ACT ta imbes a nalimed dayta a gannuat ken nabulgar unay ti pannakaipakatda. Patienda a ti intelligence data gathering ket nasken a naulimek wenno nalimed nga inaramid dagiti agpapaay kadagiti intelligence groups, saan ketdi a ti hepe ket agmemorandum kadagiti mangidaulo kadagiti eskuela a mangkiddaw iti listaan ti inventory dagiti mangisursuro a miembro ti ACT. Ibilangda a ti napasamak a nangipaay iti amak kadagiti opisial ken mangisursuro iti DepEd ket ipaneknekna ti gannuat a short cut wenno pangdarasan dagiti intelligence operatives ti PNP.

Kondenaren dagiti mangisursuro ti ACT members profiling, ta ad-adu koma dagiti mas importante a gannuat nga ipangruna dagiti polis iti pannakatagiben ti urnos, kappia ken talna, babaen ti pannakalapped ken pannakasolbar dagiti krimen iti pagilian. Imbes a dagiti miembro ti ACT ti ammuenda ti kinataoda ken tiktikanda, ket ipangrunada koma a duktalen dagiti police scalawags wenno rinuker a kameng ti PNP a mangdaddadael ti institusion ken mangiramraman kadagiti polis a napudno ti panagserbida iti pagilian.

Saan a mailibak ti agdadata a kinapudno a kasapulan ti naing-inget nga internal cleansing wenno panangdalus iti PNP gapu kadagiti masansan a maipadpadamag a kameng nga aglablabsing iti linteg. Sakbay ti PNP profiling kadagiti agpapaay iti DepEd, rebbengna nga unaenda dagiti kamengda a mangdaddadael ti imahe dagiti agpapaay iti gobierno ken manggungundaway kadagiti tattao. (Eden Alviar)