PNP regional director kadagiti police recruits: saan nga ordinario a pagsapulan kinapolis

LA TRINIDAD, Benguet – Naggibus ti Field Training Officers Development Program (FTODP) babaen ti maysa a simple a seremonia a naangay ditoy nga ili itay Septiembre 17.

Addaan iti tema a “With Adequacy in Learning, We Can Gain the Mastery of Professionalism”, immatendar ditoy dagiti polis manipud iti PRO1, PRO Cordillera, ken ti Field Training Officers Development Program Mobile Training Team-Luzon-based.

Panggep ti FTODP ti mangipaay kadagiti napili a police non-commissioned officers (PNCOs) iti pannakaammo, kabaelan ken attitude maipanggep iti pannakaidur-as ti sagudayda a mangidaulo iti pagrebbenganda a kas Field Training Officers a mangimaton iti on-the-job training dagiti police recruit.

Kinuna ni Police Regional Office 1 Director Chief Superintendent Ricardo C. Marquez, nga uray iti ubing pay a career dagiti recruits, maipaawat kadakuada a saan nga ordinario a pagsapulan ti trabaho ti polis no di natan-ok a propesion a makasapul ti naimpusuan a dedikasion, kinapudno ken sakripisio.

“Importante kadagiti recruits a saanda laeng a maammuan ti academic a paset ti propesion ti maysa a polis no di pay pamiliarda iti aktual a realidad ken kadagiti signipikante a trabaho ti maysa a patrol officer, nangruna iti kinapateg ti police visibility,” kinuna ni Marquez.

Inlawlawag pay ti regional director ti PATROL PLAN 2030 a mangipaay iti pundasion iti pannakaidur-as ti field training exercise a pakaiyunay-unayan ti panagpatrolia, panagtrapiko ken umuna nga panagresponde.

Segun ken ni Marquez, rumbeng a mangrugi ti panagbalbaliw ti PNP iti sistematiko a wagas a saan ketdi a babaen laeng ti pitik ti ramay wenno kas mahika a magun-od laeng iti maysa a rabii, sana innayon nga ikut koma dagiti FTP officers ti umisu a panagsanay tapno agbalinda a responsible, makabael ken propesional iti panangiggemda iti panagsursuro dagiti agdadamo a polis.#