POEA E-Registration, nairusat iti Candon City

 

CANDON CITY – Ginasut nga aplikante ti nanggundaway iti E-registration program nga inrusat ti Philippine Overseas Employment Agency (POEA) ken nakibinnuligan daytoy a siudad idi Mayo 4.

Kinuna ni Joyce Sanchez, regional director ti POEA, nairusat ti nasao a programa tapno matulongan dagiti kailian a kayatda ti agtrabaho iti ballasiw-taaw babaen ti government to government employment program ken tapno maliklikan ti pannakabiktimada kadagiti illegal recruiters.

Segun ken ni Sanchez, awan ti placement fee ken sigurado a nangatngato ti maited a sueldo kadagiti mapili nga agtrabaho iti babaen ti government to government hiring.

Iti agdama, konektado ti POEA iti daytoy a programa kadagiti pagilian ti Germany, South Korea, Taiwan, ken Japan.

Kinuna pay ni Sanchez a mabalin ti siasinoman ti agrehistro iti daytoy a programa uray adda laeng iti balayda wenno iti internet cafe, basta konektadoda iti internet.

Mapanda laeng iti website ti POEA para iti naan-anay nga impormasion, kinuna ni Sanchez.#