Police elements, nakakumpiska iti droga, paltog iti balay ti drug personality

TAGUDIN, Ilocos Sur – Sabali pay a drug personality ti nanabtuog iti ima dagiti pannakabagi ti linteg iti inwayatda a panagsukisok iti balay ti suspek sadiay Barangay Del Pilar ditoy nga ili idi agsapa ti Agosto 12.

Kalpasan a nagpositibo ti search operation nga insayangkatda iti balay ti suspek, tiniliw dagiti nagtitipon nga elemento ti kapolisan a pakaibilangan ti Tagudin Police Station, PIB, ISPAIDSOTG, PIDMB ken PDEA ISSET ni Angelo Castro y Mina, 45, naasawaan, karaman iti top 3 iti drug watch list ti Tagudin police station ken residente iti Barangay Del Pilar ditoy met laeng nga ili.

Iti panagsukisokda iti balay ni Castro, nakakumpiska dagiti polis iti maysa a cal. 38 revolver a nagmarka iti Smith and Wesson; 9 a bala para iti cal. 38; 5 nga small heat sealed plastic sachet a naglaon iti mapapati a shabu; 7 a di nausar a plastic para iti repacking; 3 a lighter; ken maysa a samurai.

Imet dagiti polis ti dua a search warrant a pinirmaan ni Judge Narciso Mingua ti MCTC, Tagudin-Suyo, Ilocos Sur idi napanda nagsukisok iti balay ni Castro idi agarup 6:45 ti agsapa ti Agosto 12.

Naiwayat ti panagsukisok iti imatang dagiti opisial ti nasao a barangay, kameng ti Media ken pannakabagi ti DOJ.

Iti pannakaisurat daytoy, maisagsaganan ti kaso a panaglabsing iti RA 10591 ken RA 9165 maikontra ken ni Castro.
Kabayatanna, idi agsapa ti Agosto 11, naireport ti maysa a Marvin Yago y Villamar, 24, baro, laborer ken residente iti Barangay Malamin, San Juan, Ilocos Sur, a nagpaputok bayat ti panagiinomda nga agkakadua iti maysa a lamayan iti lugarda.

Idi nagresponde dagiti tanod, agtultuloy pay laeng ti panagiinom ti grupo ket iti panagsalsaludsodda maipanggep iti daytoy nga insidente, naitudo a ni Yago ti nagpaputok.

di agarup 7:30 ti agsapa ti Agosto 12, mapapati nga insuko ni Yago ti maysa a homemade gauge 12 buckshot nga awanan marka ken serial number ken ni Barangay Captain Edna Vito Cruz.

Impaima met ti barangay captain ti paltog iti San Juan police station para iti umisu a disposision.

Naiyendorson ti kaso a panaglabsing iti RA 10591 maikontra ken ni Yago iti provincial prosecutor’s office, Vigan City, Ilocos Sur.

Immun-una ngem daytoy, idi sardam ti Agosto 9, nagresponde dagiti polis-Candon idi makaawatda iti pulong manipud iti maysa a tanod nga adda napasamak a ringgor iti maysa a compound sadiay Barangay Darapidap a nakainbolbaran ti maysa nga agnagan iti Telesporo Balbin y Ramirez, 51, mannalon, ken Tomy Balbin, Sr., 52, naasawaan, ken mannalon.

Kas maibatay iti report, idi makadanon dagiti polis iti nasao a lugar, mapapati a pinaturongan ida ni Tomy Balbin iti paltog.

Kalpasan a natiliwda ni Tomy Balbin, sinukisok dagiti polis ti bisinidad ti balay daytoy iti sanguanan ni Barangay Captain Ricardo Bugasto ket nakasarakda iti caliber 9mm a nagmarka iti Taurus PT 92-AF PNP property nga addaan iti 3 a bala ken maysa a loaded a magazine a nailemmeng iti uneg ti sako a nagkarga kadagiti nagango nga ambuligan.

Bayat a maisursurat daytoy, nakadetene pay ni Balbin iti police station sakbay a maiyalis iti pagbaludan iti siudad.#