Police inspection team, nakasukain droga, drug paraphernalia iti nakaipupokan ti drug personality

VIGAN CITY – Lalo pay a dimmagsen ti sangsanguen a kaso ti maysa a babai a drug personality kalpasan a nakaduktal dagiti polis kadagiti plastic sachet a nagkarga iti mapapati a shabu residue ken drug paraphernalia iti nakaibaludanna idi malem ti Hunio 24.

Sumangsango ni Oco iti kaso a panaglabsing iti RA 9165 kalpasan a nakasamsam dagiti polis kadagiti mapapati a droga ken drug paraphernalia idi sinukisokda ti balayna idi agsapa ti Hunio 16.

Insayangkat ti inspection team a binuangay ni Police Supt. Jugith Javillonar Del Prado, hepe ti polis ditoy siudad, ti panagsukisok iti nakaibaludan ni Rheliza Oco y Parel, 36, kalpasan a nakaawatda iti impormasion manipud iti maysa a civilian asset nga adda naipuslit a droga iti detention cell ni Oco.

Iti panagsukisok dagiti polis iti detention cell ni Oco, nakasarakda iti lima a pedaso ti transparent plastic sachet a nagkarga iti mapapati a shabu residue, 3 nga improvised aluminum foil tooters; 3 pedaso nga aluminum foil, maysa nga improvised glass tooter nga addaan masuspetsa a shabu residue, 3 pedaso a disposable lighter ken maysa a Samsung cellular phone.

Saan a nailanad iti blotter no ni met laeng Oco ti nagusar kadagiti masuspetsa a droga.

Sakbayna, binisita ti maysa a Joel Ragunton, kalib-in ni Oco, ken residente iti Barangay Tamag, Vigan City, ken nakita nga immar-arubayan iti nakaipupokan ni Oco.

Masuspetsa a nailibas a naiyawat dagiti mapapati a droga ken ni Oco agsipud ta nakalukat ti tawa ti nakaipupokanna.

Naipaiman dagiti nakumpiska ken ni Oco iti Crime Lab Office para iti pannakaamirisda.

Naaresto ken naikursong iti pagbaludan ni Oco kalpasan a nagpositibo ti panagsukisok nga insayangkat ti nagtitipon nga elemento ti kapolisan iti pagtaenganna sadiay San Julian Sur, Vigan City, idi agsapa ti Hunio 16.

Nakasukain dagiti polis iti balay ni Oco iti dua nga small heat sealed plastic transparent sachet a nagkarga iti masuspetsa a shabu; maysa a plastic trans-parent sachet a nagkarga iti mapapati a shabu; nalukatan a plastic transparent sachet a naglaon iti suspected shabu residue; maysa nga improvised burner; 5 nga improvised plastic scooper; 2 nga impro-vised glass totter; ken assorted a drug paraphernalia.#