Footer

Police officers, mayor, doktor a nakatulong pannakaraut iti shabu lab, naikkan pammigbig

SAN FERNANDO CITY – Binigbig ti police regional office ditoy dagiti police officers, ken dadduma pay a nakatulong iti pannakaraut ti maysa a laboratorio ti shabu iti Barangay Upper Bimmotobot, Naguilian, La Union.

Naited ti Medalya ng Kagalingan ken ni La Union Provincial Director Police Senior Supt. Noli G. Taliño, Police Supt. Jacquilino S. Lagiwid, Police Supt. Jane A. Aunzo, Police Chief Inspector Gil D. Gempes, Police Chief Inspector Erwin T. Dayag, Police Chief Inspector  Efren T. Geraban, Police Chief  Inspect-or Anamelis S. Bacani, Police Inspector Meilani Joy R. Ordoño and Senior Police Officer 1 Pablo G. Florendo Jr. kas pammigbig iti naisangsangayan a serbisioda  iti pannakaiwayat ti operasion a panagsiim ken panagsukisok iti nasao a laboratorio ti droga.

Naikkan met iti sertipiko iti pammadayaw kada Naguilian Mayor Abraham Rimando ken Dr. Teofilo Severo E. Dumaguin Jr., municipal health officer ti nasao nga ili gapu iti “di magatadan a suporta ken tulongda” iti nasao nga operasion.

Kinuna ni Police Chief Supt. Ramon V Gatan, Deputy Regional Director for Administration ken Task Force Bimmotobot Commander, a maysa a pammaneknek ti nasao iti outstanding performance ken sincere commitment dagiti napadayawan iti nainget a kampania maikontra iti droga.

Dinayaw pay ni Gatan dagiti residente ti Naguilian gapu iti pannakikinnamayyetda iti pannakatakuat ti nasao a laboratorio ti shabu.

“Napateg ti papel dagiti ordinario nga umili iti pannakaireport iti krimen,” kinuna ni Gatan idinto nga innayonna a dagiti agnaed iti Bimmotobot ti kaunaan a nangireport iti nasao nga operasion.

Maipalagip nga idi Hulio 9, rinaut dagiti polis ti nasao a shabu laboratory a nakasamsamanda kadagiti ramramit ken ingrediente iti panagpartuat iti shabu.

Mapattapatta a makapartuat dagitoy iti agpateg iti P1 trillion a shabu a kuna dagiti polis a kadakkelan iti Luzon no di man iti sapasap a pagilian.#