Footer

Police Regional Office I, kasayaatan a PRO iti intero a pagilian

SAN FERNANDO CITY – Impakaammo ni PNP regional director Police Chief Superintendent Leopoldo N. Bataoil a  napili manen ti police regional office ditoy a kasayaatan a PRO iti intero a pagilian.

Kinuna ni Bataoil a maragsakan kadagitoy a pammadayaw a naipaay iti PRO Region I nga adda iti babaenna.

Daytoy ti nagsaruno a panangabak ti PRO Region I a kasayaatan ken grand slam winner pay gapu iti pannakagun-od dagiti tallo a units ditoy ti kangatuan a puntos kadagiti amin a PRO iti nailian a panagbirok kadagiti kasayaatan a PNP Units.

Kangatuan iti nagun-od a puntos kadagiti amin a naisalip para iti kasayaatan a PNP Units iti pagilian ti PRO1 Regional Mobile Group 1 iti babaen ni Police Senior Supt. Edgar Basbas; ti Pangasinan PPO iti babaen ni Police Senior Supt. Isagani Nerez; ken ti Dagupan City Police Station iti babaen ni Police Supt. Dionicio Borromeo .

Segun ken ni Bataoil, naibatay iti pannakapili dagiti mapadayawan a PNP units iti resulta ti pinal nga ebaluasion nga insayangkat ti NHQ PNP Validation Team nga indauluan ni PDIR Charlemagne S. Alejandrino, PNP Directorate for Logistics.

Napadpadayawanen ti PRO1 manipud idi nabuangay daytoy idi 1990.

Inawatna ti best PRO award idi 1997 iti babaen ni dati a regional director ken agdama a gobernador ti Pangasinan Amado Espino, Jr., idi 2000 iti babaen ni Gen. Jose Ayap, ken idi 2006 ken 2007 iti babaen ni Bataoil.

Kinuna ni Bataoil a pinaneknekan ti opisinana a daytoy ti kasayaatan iti sapasap a pagilian idinto a dinayawna dagiti personnel agingga iti kababaan a police units gapu iti pannakitinnulongda a “nangkulding iti biag dagiti tattao, panagballigida kadagiti rupak nga awan ti naiputok a bala ken panangipakatda kadagiti paglintegan nga awanan iti buteng ken pabor.”

Iyawat ni Pres. Gloria Macapagal-Arroyo dagiti pammadayaw inton Pebrero 6  kas maysa kadagiti tampok ti panangrambak ti PNP ti maika-17 nga anibersariona.#