Polis, addan lead mainaig iti BHF Pawnshop robbery

SAN FERNANDO CITY – Addan lead a sursuroten dagiti inbestigador mainaig iti kinasiasino dagiti nagtakaw iti maysa a pawnshop iti Barangay Biday ditoy siudad.

Nupay kasta, nagkedked ni Senior Supt. Ramon Purugganan, provincial director ditoy, a mangibaga iti kanayonan a detalye tapno saan a maunaan ti panagpalutpotda.

Mapattapatta a nasurok a maysa a milion ti kinasakas dagiti mannanakaw iti BHF Pawnshop.

Mapapati a nagna dagiti mannanakaw iti kanal manipud iti rangtay idiay Barangay Pagdaraoan agingga iti asideg ti pawnshop sada nagkali iti tunnel a kumamang iti uneg ti pawnshop.

Adda saan a kumpirmado a damag a taga-Baguio City dagiti nangisayangkat iti panagtakaw ket kaasping ti wagas ti panagtakawda kadagiti kameng ti Acetylene Gang.

Kitkitaen pay ti polis no maymaysa a grupo ti nangisayangkat iti panagtakaw  ditoy ken iti Tambunting Pawnshop iti Vigan City a natakawan met idi rabii ti Nobiembre 1.#