Footer

Polis, binagsol ti anakna

CAOAYAN, Ilocos Sur – Mapapati a di panagkinnaawatan ti nakaigapu iti panangbagsol ti maysa nga anak iti amana a polis sadiay Barangay Callaguip ditoy nga ili idi malem ti Disiembre 13.

Naammuan manipud iti report ti polis ditoy a binagsol ni Jayson Frando y Aspacio, 22, baro, ti amana a ni PO2 Nelson Frando y Cabello, 45, balo, PNP member a nakadestino police station ditoy nga ili bayat ti maysa a birthday party iti balay ti biktima iti nadakamat nga aldaw.

Segun iti report, bayat ti nasao nga okasion, kellaat a nagprobokar ni Jayson a nabarteken ket inanawa ti amana ngem mapapati a nagpungtot ti suspek ket binagsolna ti amana a nagsagrapan daytoy iti sugat iti makannigid nga abagana ken makannigid a takiagna.

Naitaray ti biktima iti Gabriela Silang General Hospital idinto nga inaresto dagiti nagresponde a polis ti suspek.

Saan a narekobre dagiti polis ti patadem a naaramat iti pammagsol.#