Polis-Candon, imminget panagmonitorda business estalishments gapu iti ballaag a matakawanda

CANDON CITY –Ā  Imminget ti panangmonitor dagiti polis ditoy kadagiti business establishments nangruna iti pannakapaliiw ti Semana Santa itay nabiit kalpasan ti ballaag a matakawan ti maysa a bangko ditoy siudad.

Kinuna niĀ  Police Supt. Marlo Castillo, agdama a chief of police ditoy siudad, a nangiwayatda iti naing-inget a police visibility kadagiti lugar a nakaipasdekan dagiti business establishments ken dagiti bangko tapno adda paggudengan dagiti dakes nga elemento a mangibanag iti panggepda a panagtakaw kasta met a naginspeksionda kadagiti kanal a dalanen ti danumĀ  tapno penkenda no adda nagkalian kadagitoy.

Sakbayna, nakaawat iti text ti maysa nga empleado ti RCBC Bank ti Candon City branch a nakailanadan ti ballaag a panggep a takawan ti Butas Gang ti nasao a bangko iti pannakapaliiw ti Semana Santa.

Kas maibasar iti blotter ti polis, ti teller a ni Bona Marichi Regunal ti nakaawat iti text a mangbalballaag kadakuada a serken ti Butas Gang ti bangko.

Insigida nga inreport ni Norie Balagot, manager ti nasao a bangko, ti naawatda a text iti polis tapno maantisiparan ti aniaman a posible a mapasamak.

Kinuna ni CastilloĀ  nga adda naituding a polis nga agpatrolia kadagiti financial institutions nangruna itay Semana Santa.

Kinunana a nangisayangkat dagiti polis iti inspeksion kadagiti kanal a pagdaldalanan ti danum iti aglawlaw ti merkado publikoĀ  tapno makita no adda dagiti pakailasinan a panagtubtob kadagiti tubo.

Modus operandi ti Butas Gang ti iseserrekda iti kanal a pagnaan ti danum sada agkali iti namnamaenda a batog ti vault ti pawnshop wenno bangko a kayatda a takawan.

Kanaig daytoy, indagadag manen ni Castillo ti panangipasdek dagiti bangko ken pawnshop iti CCTV camera wenno alarm device kas paset ti seguridadda kadagiti mannanakaw.#