Polis-Dagupan, naikkan komendasion dagus pannakaaresto pimmaltog iti mediaman

SAN FERNANDO CITY – Inikkan ti Police Regional Office 1 ditoy ti komendasion dagiti polis-Dagupan gapu iti dagus a pannakaaresto ti masuspetsa a nanggandat iti biag iti maysa a kameng ti media iti Barangay Pantay, Dagupan City idi Agosto 26.

Inikkan ni Police Chief Superintendent Roman A. Felix, Regional Director of Police Regional Office 1 (PRO1) iti komendasion ni Police Supt. Christopher Abrahano, hepe ti police, ken dagiti polis nga adda iti babaenna gapu iti pannakaaresto a dagus ni Rolando A. Lim Jr. alias “Ronnie/Oning, ti suspek a nanggandat iti biag ni Orlando “Orly” Navarro, 54, naasawaan, ken residente iti Pantal District ken station manager of DWIZ FM a nakabase iti nadakamat a siudad.

Segun iti report, makipatpatang ni Navarro iti drayber ti traysikel a naglugananna kalpasan a dimsaag idi pinaltogan ni Lim.

Nagsagrap ni Navarro iti sugat iti makannigid nga abagana ket naitaray iti Pangasinan Medical Center. Naireport a nakalasaten ni Navarro iti peggad.

Imbilin ni Felix ti panangisayangkat da Abrahano iti in-depth investigation mainaig iti pannakapaltog ni Navarro.#