Polis, dinungpar traysikel bayat panagtrapikna

CANDON CITY – Nakainom iti arak ti lalaki a nakadungpar iti maysa a polis bayat ti panangmaneharna iti trapiko iti sanguanan ti maysa a panganan idi malem ti Agosto 1, daytoy ti indeklara ti doktor iti ospital a nakaitarayanna kalpasan ti aksidente.

Segun iti attending physician a nangtaming ken ni Pascual Galdones y Haboc, 54, naasawaan ken residente iti Barangay Ayudante, Candon City, positibo daytoy a nakainom idi dinungparna ni PO1 Dante dela Rosa y Velasco, 22, baro, madama ti panagsanayna iti field training program iti police station ditoy, ken residente iti Barangay Nagtupacan, Sta. Maria, Ilocos Sur, bayat ti panangmanehar daytoy iti trapiko  iti sanguanan ti Big Mac a masarakan iti Barangay San Jose, Candon City.

Nagsagrap ni  dela Rosa iti dunor iti makannigid a sakana ken garadgad iti nadumaduma a paset ti bagina ket naitaray iti Candon General Hospital gapu iti nasao nga aksidente.

Segun iti report, agpaamianan a direksion ti traysikel a minaneho ni Galdones ket bayat ti panagdaliasatna iti national highway a sakup ti Barangay San Jose, Candon City, mapapati a liniklikanna ti maysa a Fuso 6D22 gas tanker a minaneho ni Federico Aquino y Balallo, 42, naasawaan ken residente iti #189 Tanqui, San Fernando City, isu a naturong ti luganna ti akindaya nga abaga ti kalsada a pagtraptrapikan ni dela Rosa ken nakadungparanna iti polis.

Gapu iti impact iti panangdungparna iti polis, nagpusipos ti traysikel sana dinungpar ti maysa a Toyota Corolla a nakaparking iti sango ti Magic Dream Satellite TV.

Nakulpi ken nagsagrap iti scratches ti akinlikud a bumper ti Toyota.#