Polis a nagpaputok iti paltog, nasaklangan iti kaso

STO. DOMINGO, Ilocos Sur – Agsakit la ketdi ti ulo daytoy a polis agsipud ta nasaklangan iti kaso gapu iti panagpaputokna iti paltog idi rabii ti Nobiembre 20.

Iti report manipud iti police station ditoy, naiyendorson iti opisina ti provincial prosecutor, Vigan City babaen ti inquest proceedings ti kaso nga alarm and scandal and illegal possession of firearm maikontra ken ni James Paeta y Tagay, 37, naasawaan, nakadestino iti SOCOM, Nueva Ecija ken residente iti Barangay Nagbettedan, Sto. Domingo.

Maipalagip nga idi agarup 9:30 ti rabii ti nadakamat a petsa, nakaawat ti police station iti report nga adda nagpaputok iti paltog iti provincial road a sakup ti Barangay Nambaran, ditoy nga ili.

Iti panagimbestiga dagiti nagresponde a polis, naammuan a bayat ti panaggawid da Arnel Tadios y Tapiceria, 39, baro, mannalon; Joshua Moresco y Tadios, 25, baro, construction worker ken Melvin Tadios y Luciano, 24, furniture maker, residenteda amin iti Barangay Nambaran, idi simmardeng dagiti suspek a nakalugan iti Honda TMX 125 sada kinompronta dagiti tallo no apay a magmagnada iti tengnga ti kalsada.

Mapapati a tinungpa ti maysa kadagiti suspek nga idi agangay ket nabigbig a ni Paeta ni Moresco ket idi immasideg ti kadua daytoy, inruar ti polis ti paltogna manipud iti sling bagna ngem mapapati a pimmutok daytoy.

Narekobre dagiti polis iti ikut ni Paeta ti maysa a shooters commodore cal. 45 nga addaan serial number, 3 magazine assembly para iti cal. 45 ken 10 a bala para iti isu met laeng a kalibre. Adda ita dagitoy iti ikut ti Sto. Domingo police station para iti disposision. (Tawid News Team)