Polis, nagtagiarmas a tattao riding in tandem, nagkikinnamat

BANTAY, Ilocos Sur – Saan a nagpatingga dagiti polis a kimmamat kadagiti mapapati nga armado a tattao a nagkalubbon iti motorsiklo agingga iti saanda a natiliw dagitoy iti nagsina nga insidente a napasamak ditoy nga ili idi Oktubre 4 ken iti Sinait, Ilocos Sur idi Oktubre 2.

Iti naudi nga insidente, nagresponde dagiti polis ditoy nga ili a napan nagimbestiga iti Barangay Sinabaangapu iti naawatda a tawag iti telepono nga adda napasamak a riri iti nadakamat a barangay idi agarup als 12:00 ti tengnga ti aldaw ti Oktubre 4.

Bayat ti panagimbestiga dagiti polis, dua a suspetsado a lallaki a nakalugan iti single motorcycle ti napakaskas a limmabas nga agpaabagatan a direksion.

Kinamat dagiti polis dagiti suspek ket nasiputanda nga adda impalladaw ti maysa a nakalugan iti kapagayan.

Naipiskot dagiti polis ti maysa kadagiti suspek a nabigbig iti nagan nga Angelito Ramboangan y Cariño , 47, naasawaan, ken residente iti Barangay Sinabaan, ditoy nga ili ngem nakalibas ti kaduana a nainaganan Jonar Nuñez, agnaed met laeng iti naso a barangay.

Nagsawar dagiti polis iti kapagayan ket narekobreda ti maysa a US carbin cal .30 M1 nga addaan iti back to back short magazines a nagkarga iti 28 a bala.

Naipan ni Ramboangan agraman ti paltog iti police station para iti umisu a disposision.

Kabayatanna, napilaanen iti kaso a panaglabsing iti RA 8294 da Jerwin Agdeppa, residente iti Barangay Magsaysay, ken Jayrald Yabes, residente iti Barangay Calanotian, Sinait, Ilocos Sur.

Kinamat dagiti polis-Sinait dagiti dua a suspek a riding in tandem a mapapati a nagpaputok iti Barangay Calanutian, Sinait, Ilocos Sur idi agarup alas 10:20 ti rabii ti Oktubre 2.

Nasalaw dagiti nagresponde a polis nga indauluan ni DCOP PSI Battulayan dagiti suspek iti national highway a sakup ti Barangay Magsaysay ket pinarada ngem pinaputokan ida dagitoy sada pinayasyas ti motorsikloda a naglibas.

Kinamat dagiti polis dagiti dua manipud Barangay Curtin, Paratong, Sabangan agingga iti Barangay Teppeng a pannakaikras ti motorsiklo ngem nagtaray dagiti suspek a naglibas.#