Polis, nakakumpiska, paltog, balbala, drug paraphernalia iti balay arestado iti buy-bust operation

VIGAN CITY – Paltog, balbala ken shabu paraphernalia ti nakumpiska dagiti polis iti insayangkatda a panagsukisokĀ  iti pagtaengan ti maysa a naaresto a masuspetsa a drug pusher iti Barangay 9, ditoy siudad idi rabii ti Marso 16.

Iti follow-up operation nga insayangkatda iti balay ni Marlo Lim, 36, residente iti Barangay 9 ditoy siudad, nakasamsam ti nagtiponĀ  a bunggoy ti Provincial Anti Illegal Drugs Special Operations Task Group (PAIDSOTG) ken Ilocos Sur Criminal Investigation and Detection Group (CIDG) nga indauluan ni PCI Arbel Mercullo ken polis Vigan iti superbision ni Vigan COP PSupt. Elpidio Nartatez iti maysa a Magnum Caliber .22 nga addaan pito a bala, plastic sachet nga addaan mapapati a shabu residue ken drug paraphernalia.

Imet dagiti polis ti maysa a search warrant a pinirmaan ni Judge Francisco Ante, Jr. ti MCTC Vigan City idi nagsukisokda iti pagtaengan ni Lim a sinaksian dagiti barangay officials iti panangidaulo ni Barangay Captain Antonio Arcellana.

Sakbayna, natiliw ni Lim ken maysa a managan Eric Filart iti buy bust operation nga inwayat ti PDEA PAIDSOTG ken CIDG-Ilocos SurĀ  iti maysa a panaderia iti Zone 4, Bantay, Ilocos Sur idi Marso 16.

Nakumpiska iti ikut ni Lim iti 8 gramo a shabu kalpasan a mapapati nga inyawatda ti plastic sachet iti maysa a kameng ti CIDG a nagpammarang a maysa a buyer.

Kinuna ni Mercullo a makabulan a sinipsiputanda da Lim ken Filart sakbay nga insayangkatda ti buy bust operation a nagtungpal iti pannakatiliw dagiti suspek.#Ā