Polis a nakapatalaw iti balud, nakasuan

VIGAN CITY – Iti baet ti pannakatiliw met laeng ti babai a balud a naglibas idi Hulio 27, sumango latta iti kaso ti desk officer ti police station ditoy a nangipalubos iti iruruarna iti pagbaludan.

Iti kaudian a report, naiyendorson ti kaso a panagsalungasing iti Article 224 iti Revised Penal Code (Evasion through Negligence) maikontra ken ni SPO1 Rolly Tabuso Tactac iti inquest proceeding iti City Prosecutor’s Office ditoy.

Nakasuan ni Tabuso, detailed desk officer iti Vigan City police station, gapu iti panangipalubosna ken ni Marivic Habab y Valdez, 54, a rummuar iti seldana tapno mapan gumatang iti kape a saanna a pinakaammuan ti duty officer.

Iti inisial nga inbestigasion, kiniddaw ni Habab, naaresto iti panagtakaw idi Hulio 18, 2014 ken nairekomenda nga agpiansa iti P10,000 para iti temporario a wayawayana, ken ni Tabuso a mapan gumatang iti kape iti tienda iti likud ti police station.

Linuktan ni Tabuso ti padlock ti pagbaludan ngem saanna nga impakaammo ken ni Chief Inspector Antonio Lawagan Malicdan, duty officer iti iruruar ni Habab

Kasta met a saanna nga impakaammo ken ni PO1 Habata Alshani, duty jailor, a nairana nga adda iti comfort room iti dayta a kanito.

Saanen a nagsubli ni Habab iti pagbaludan.

Nangiwayat dagiti polis iti manhunt operation ngem saanda a nasarakan daytoy.

Nupay kasta, natiliw met laeng ni Habab idi Hulio 28.

Gapu iti napasamak, napagpalawag babaen iti surat da Tactac ken Alshani ken naipakatanda iti restriksion iti estasion kabayatan ti pannakaimbestiga ti insidente.

Nagbalin a saksi ni Alshani iti pannakaikaso ni Tactac.

Napasamak daytoy awan pay makabulan kalpasan ti pananglibas ni Rodrigo Abiang, mapapati a lider ti gun for hire group kadagiti dua a guardiana idi Hunio 30.

(Iti pannakaisurat daytoy, natiliwen ni Rodrigo Abiang ket naisublin iti provincial jail. -Ed)
Kinuyog dagiti provincial guard ni Abiang tapno sumango iti pannakabista iti sabali a kasona iti korte ti Narvacan ngem gapu ta nasapa pay, mapapati a napanda nagsinanglaw iti maysa a panganan ket ginundawayan metten ni Abiang a tinarayan ida.#