Polis, nakasuan gapu iti indiscriminate firing, panaglabsing iti gun ban

Agsakit la ketdi ti ulo daytoy a polis gapu ta sumango kadagiti kaso gapu iti panagpaputokna iti paltog idi malem ti Marso 8.

Kas maibatay iti report manipud iti polis ditoy, naisalpak ti kaso nga illegal discharge of firearm, panaglabsing iti RA 10591 ken Comelec gun ban maikontra ken ni PO1 Wilfredo Anicoche Rosario, naasawaan, PNP-Maritime Police a nakadestino iti San Fernando City Maritime Office, San Fernando City, La Union ken aggigian iti Barangay Tamorong, Caoayan, Ilocos Sur.

Idi agarup 6:39 ti sardam ti Marso 8, nagpulong iti polis ditoy ni Bibiana Acejo Adona, 69, naasawaan, ken residente iti Barangay Bongtolan, a nagpaputok ni Anicoche iti asideg ti tiendana idi agarup 3:30 ti malem iti dayta a petsa.

Kas maibatay iti pulong ni Acejo, agprobprobokar nga immasideg ti suspek iti sari-sari store a paglaklakuanna a nakaiggem iti paltog sana impaputok iti naminsan.

Saan a nailanad iti report no ania a paltog ti inaramat ni Anicoche ken no adda kinariri ni Anicoche idi nagpaputok.

Nagresponde dagiti polis ngem dida nasapulan ti polis ken awan ti narekobreda nga ebidensia iti naireport a nagpaputokan daytoy.

Iti pannakaisurat daytoy, naipaiman iti city prosecutor’s office, Vigan City dagiti kaso maikontra ken ni Anicoche ket nai-docket dagitoy iti babaen ti NPS Number I-14-INV-16C-00037.#