Polis, nasarakan ti anakna a napaltogan iti balayda

NARVACAN, Ilocos Sur – Suicide ti kitkitaen dagiti inbestigador a makagapu iti pannakapaltog ti maysa a polis iti uneg ti balayna iti Barangay Paratong ditoy nga ili idi Marso 8.

Naammuan ti polis ditoy ti pammaltog a nakatayan ni  Raymundo Espiritu y Antonio, 37, balo, PNP member a naka-assign iti Cervantes Municipal Police Station, ken residente iti nadakamat a barangay idi inreport ti kabsat ti biktima a ni Tedy Espiritu, 38, naasawaan, residente iti Barangay Paratong, ti napasamak iti police station iti agarup alas 12 ti aldaw ti dayta met la a petsa.

Segun iti report, nadatngan ni Chrismund John Espiritu ti amana a nadigos iti bukodna a dara iti uneg ti balayda idi aggawid iti balayda manipud iti eskuela iti nagbaetan ti alas 11:30-11:45 ti aldaw ti nadakamat a petsa.

Iti panagimbestiga ti SOCO team nga indauluan ni Police Supt. Daniel D. Coronel, nagsagrap ti biktima iti sugat iti ulona a puon ti nakata-yanna.

Narekobre dagiti inbestiga-dor ti maysa a kapsula a mapapati a nagtaud iti cal .45 iti nakapasamakan ti krimen.

Suicide ti kitkitaen dagiti inbestigador nga anggulo iti pammaltog.

Mapapati a problema a pinansial ti nakaigapu iti pammaltog.

Naipakatan ti biktima iti paraffin test tapno maammuan no positibo iti pulbora ken post mortem examination.

Kabayatanna, naireport a maysa a mannalon ti napaltogan a puon ti nakatayanna idi rabii ti Marso 7 iti Barangay Remedios, Cervantes, Ilocos Sur.

Segun iti report, adda ni Frederick Alaman y Dawang, 33, naasawaan, mannalon, ken residente iti nadakamat a barangay, iti  dalanna nga aggawid idi pinaltogan ti saan pay a nabigbig a tao a nakasugatanna iti likud ti ulona.

Naitaray ti biktima iti Bessang Pass Memorial Hospital iti Cervantes, sa naiyakar iti Lorma Hospital iti San Fernando City.

Madama ti panagpalutpot no ania ti motibo ti pammaltog.#