Footer

Polis, natay iti aksidente ti lugan

NARVACAN, Ilocos Sur – Natay bayat ti pannakatamingna iti ospital ti maysa a polis gapu iti pannakidinnungpar ti motorsiklona iti maysa a kotse iti national highway iti Barangay Lungog, ditoy nga ili idi agsapa ti Oktubre 2.

Pimmusay ni PO1 Freddie Bacuyag y Liwag, 25, baro, PNP member a naka-assigned iti Special Action Force (SAF), addaan student permit ken residente iti Boliney, Abra bayat ti pannakaagasna iti Central Ilocos Sur District Hospital gapu kadagiti sinagrapna a sugat iti nadumaduma a paset ti bagina.

Kaduana a naitaray iti nasao nga ospital ti insakaayna a ni Dennis Layugan y Lobin, 21, naasawaan, ken residente iti Poblacion, Boliney, Abra.

Nakaro a nadadael ti Kawasaki Rauser motorcycle ni Bacuyag ken ti Toyota Fortuner a lugan ni Brigido Mendoza y Cabanit, 57, retirado nga empleado ti gobierno, ken residente iti Barangay Lungog, Narvacan.

Iti inisial nga inbestigasion dagiti polis, nag-U turn ti Fortuner a naggapu iti laud nga abaga ti highway ket mapapati a saan a nakita ni Mendoza ti sumungad a motorsiklo a minaneho ni Bacuyag a nakaigapuan ti panangdungpar daytoy iti sungo ti Fortuner.

Agpada da Bacuyag ken Layugan a nakahelmet idi mapasamak ti aksidente.#