Footer

Polis, pinaltoganna text mate ni misisna

NAGBUKEL, Ilocos Sur – Dika makitextmate iti adda asawana ta pakaisarsarakan ti karadkad.

Leksion daytoy ti maysa a lalaki a nakigayyem babaen ti text iti babai nga asawa ti polis.

Napaltogan ti bukot ni Henry Garcia, residente iti Mapisi, Nagbukel, Ilocos Sur ket iti pannakaisurat daytoy, adda pay la iti ospital a pakaag-agasanna.

Nainaganan ti pimmaltog ken ni Garcia a ni PO1 Gregorio Banta, 29, residente iti Poblacion West, Nagbukel, PNP member a nakadestino iti Galimuyod police station.

Segun iti report, sinublat ni Banta ti selpon ni Maria Cristina nga asawana ket nakitana nga adda text message daytoy.

Sinungbatan ni Banta ti mensahe a sinungbatan met ni Garcia a nangipagarup a ni Maria Cristina ti katetextna agingga nga inawis ti suspek ni Garcia iti balayda.

Saanen a nakaliklik ti biktima idi ti asawa ti textmatena ti simmango kenkuana. Mapapati a nagtungpal iti panagsubang daytoy a panagsarang dagiti dua.

Innala ni Banta ti service firearmna a 9mm ket pinaltoganna iti namin-innem a daras ti biktima ngem maysa laeng ti timmama iti bukot daytoy.

Boluntario a simmuko ni Banta iti police station ti Nagbukel idinto a naitaray ni Garcia iti ospital.#