Footer

Polis ti Region 1 nakaalerto para iti Balik Eskwela 2008

SAN FERNANDO CITY – Imbilin ni Police Chief Supt. Romeo C. Hilomen, regional director, ti panagalerto dagiti amin a police units iti rehion bayat ti panaglulukat dagiti klase tapno masigurado ti safety dagiti estudiante.

Kinuna ni Hilomen a nayimplimentar ti plano ti seguridad iti “Balik Paaralan” manipud iti panangrugi ti panagpalista tapno malapdan ti pannakabiktima dagiti estudiante kadagiti manangallilaw ken tapno maipakat ti urnos ken talna.

Innayonna a naiwayat dagiti naing-inget a police operations ken police visibility babaen ti foot patrol, mobile patrol, intelligence monitoring ken panangmonitor ken panangkontrol iti trapiko kadagiti kolehio ken unibersidad ken aglawlaw dagiti pagadalan iti elementaria ken sekundaria.

Kinuna ni Hilomen a naiwayat pay ti panagpatrolia dagiti polis kadagiti lugar a publiko ken pagtagilakuan tapno malapdan ti pannakabiktima dagiti estudiante ken nagannak nga aggatang kadagiti kasapulan iti pagadalan.

Imbilin ti regional director kadagiti amin a police units iti pannakikammayyetda kadagiti amin a pangulo dagiti pagadalan ken lokal a gobierno para iti seguridad dagiti agbasbasa kas paset ti Oplan “Balik Paaralan” ti police regional office ditoy.#