Polis, tinarayanna nasapgidna a kotse ti padi

SANTIAGO, Ilocos Sur – Pinakawan ti maysa a padi ti polis a nangsapgid iti luganna kalpasan nga inkari daytoy nga ibaklayna ti magastos iti pannakatarimaan ti nadadael a paset ti kotse ti padi.

Segun iti report manipud iti polis ditoy, saanen a dumanon pay ti insidente iti korte kalpasan nga immannugot ni P02 Joepet Pulido y Paet, 28, miembro ti RPSB 1 ken residente iti Balligi Laoac, Pangasinan, nga ibaklayna ti mabusbos iti pannakatarimaan ti nadadael a paset ti Toyota Innova a kotse ni Fr. Danilo Martinez y Soliva, 47, a sinapgid ti Isuzu Crosswind a minaneho ti polis bayat ti panagdaliasatda iti national highway a sakup ti Barangay Caburao, ditoy nga ili idi agarup 5:30 ti malem ti Disiembre 5.

Personal nga inreport ni Martinez, kura paroko iti Banayoyo, Ilocos Sur, iti Candon City police station a sinapgid ti lugan ni Pulido ti kotsena ngem imbes a simmardeng ti polis, nagtultuloy ketdi a nagpataray nga immadayo kalpasan ti insidente.

Iti panagimbestiga dagiti polis, agpaabagatan a direksion dagiti dua a lugan ket idi makadanonda iti Barangay Caburao, nagsignal ni Martinez babaen iti flasher nga agpakannigid ngem saan a nagsardeng ti lugan ti polis a puon ti nakasapgidan ti makannigid a paset ti likud ti Innova.

Dagus a nangipatulod ti Candon police iti flash alarm iti kabangibangna a police stations para iti pannakatengngel ti Isuzu Crosswind.

Napasardeng ti nasao a lugan iti Sta. Lucia.

Nagturong dagiti polis-Santiago iti Sta. Lucia ket impanda ti drayber ken dagiti pasaherona iti Candon General Hospital para iti medical examination sada naipan iti Santiago police station para iti pannakainbestigada ken umisu a disposision.

Nupay kasta, nagkinnaawatan dagiti dua a partido nga ibaklay ti polis ti magastos iti pannakatarimaan ti lugan ti padi tapno saanen nga umabot pay iti korte.#