VIGAN CITY – Sinerrek dagiti mannanakaw ti post office ditoy ket kinasakasda ti koleksion a kuarta, DVD player ken naglukatda kadagiti sursurat.
Mapattapatta a sinerrek dagiti di pay nabigbig a mannanakaw ti nasao a pagibusonan iti surat iti nagbaetan ti karabian ken parbangon ti Marso 3 ket intarayda ti P3,116 a kuarta iti opisina ti post master, maysa a DVD player nga agpateg iti P2,000 ken linuktanda dagiti di pay ammo ti bilangda a sursurat.
Kinuna ti post master nga inbentarioenda pay dagiti naiwarawara a sursurat tapno maammuan no adda napukaw.
Pinadas pay dagiti mannibrong a luktan ti vault ngem saanda a nagballigi a nangkasakas iti linaonna a kuarta a koleksion, selio, ken nabayadan a money order.
Segun iti polis ditoy, naduktalan ni Jovito Alviar, ti nasao a panagtakaw idi mapan aglukat iti opisinada iti agsapa.
Iti inisial nga inbestigasion dagiti polis, naammuan a simrek dagiti mannanakaw iti opisina ti post master babaen ti panangdadaelda iti window grill.
Kinuna ni COP Maximo Taclas a padasenda nga alaen ti lemma ti ima iti bote ti maysa a soft drinks a mapapati a naginoman ti mannanakaw.
Suspetsa ti polis ditoy a saan a maymaysa ti simrek iti nasao a pagibusonan iti surat.