Footer

Poultry products, napanggep mailimed a maiserrek tapno mailako iti Ilocos Sur

TAGUDIN, Ilocos Sur – Maysa a van a nagkarga kadagiti poultry products ti nasukalan dagiti agbambantay iti quarantine sadiay Barangay Bio ditoy nga ili a mailibas a maiserrek iti probinsia idi parbangon ti Septiembre 19.

Segun iti report, pinasardeng dagiti kameng ti kapolisan ditoy nga ili, Provincial Veterinary Office ken Bureau of Animal Industru ti maysa nga Isuzu Elf truck kas paset ti panagtungpal iti pammili manipud iti provincial government a pannakaiwayat iti inspeksion kadagiti sumrek a lugan a nagkarga kadagiti animal ken poultry products iti probinsia maigapu iti sakit ti manok a naduktalan iti Nueva Ecija ken Pampanga.

Nasukalan dagiti agbambantay iti quarantine a nagkarga kadagiti itlog ti van a nakarehistro iti nagan ti maysa a Laurence T. Siapno, residentge iti Barangay Apaya, Mapandan, Pangasinan ken minaneho ni Eduardo Tabadero y Galliquez, 40, naasawaan, ken residente iti Barangay Baritao, Manaoag, Pangasinan.

Idi binirok dagiti polis ti dokumento ti pannakaibiahe dagiti poultry products, imparang ni Tabadero ti maysa a shipping permit manipud iti Eggmaster Association, Inc. a nakailanadanna a naggapu dagiti itlog iti Pampanga ken maibiahe laeng iti Cabanatuan City.

Naipan ti drayber ken ti lugan iti Tagudin police station para iti dokumentasion sada naiyawat iti Provincial Veterinary Office para iti umisu a disposition.

Napaingetan ti pannakasukimat dagiti lugan a nagkarga kadagiti animal ken poultry products a sumrek iti probinsia kalpasan a naireport ti bird flu outbreak iti probinsia ti Pampanga ken Nueva Ecija.

Nupay kasta, inalay-ayan ni Gov. Ryan Singson ti panagamak dagiti agindeg iti probinsia nga agsida iti manok babaen ti panangipaayna iti maysa a pangaldaw a boodle fight kadagiti provincial officials ken empleado no sadino a naidasar dagiti nadumaduma a potahe manipud iti manok.(Tawid News)