Poverty incidence iti Ilocos Sur, nagsuek

VIGAN CITY –  Manipud iti estadona a napanglaw a probinsia idi 1991, nagbalin ti Ilocos Sur a maysa kadagiti kabaknangan a probinsia iti pagilian itay napan a tawen.

Daytoy ti bugas ti report bayat ti Executive-Legislative Agenda workshop a naangay iti Baguio City itay nabiit.

Segun iti report, idi 1991, immabut ti poverty incidence ti probinsia iti 51.2% ket adda iti maika-29 a kapanglawan a probinsia iti intero a pagilian.

Ngem idi 2012, nagsuek ti poverty incidence iti Ilocos Sur iti 17.1% ken nagun-odna ti maika-69 a puesto iti intero a pagilian ket nagpangato ti Ilocos Sur a maysa kadagiti kabaknangan ta nagbalin ti probinsia a top 11 a kabaknangan a probinsia iti kadagupan a 80 a probinsia.

Segun pay iti report, maikadua a puesto ti llocos Sur a kababaan iti poverty incidence iti Region 1, sarsarunuenna ti Ilocos Norte. Sumarsaruno iti Ilocos Sur ti Pangasinan idinto a maudi ti La Union.

Inangay ti gobierno probinsial ti ELA workshop iti Siudad ti Saleng tapno planuenda dagiti polisia ken programa dagiti nadumaduma nga opisina ken ti gobierno probinsial para iti pannakaipaay ti napinpintas a serbisio kadagiti tattao.#