PRC, Baguio Regional Office, nangipaay “Service on the Go”

BAGUIO CITY – Kas paset ti programana a mangiyasideg ti serbisiona kadagiti umili, mangipaay manen ti Professional Regulatory Commission (PRC), Baguio Regional Office, iti “Service on the Go” iti Mountain Province ken iti Ilocos iti umuna a lawas ti Hulio, daytoy ti impakaammo ni Regional Director Teofilo Gaius M. Sison, Jr.

Kinuna ni Sison a maisayangkat ti mobile outreach services iti Mountain Province inton Hulio 7 babaen ti koordinasion ti Mountain Province State Polytechnic College, Tadian Campus, Tadian, Mountain Province  ken inton Hulio 8 babaen ti koordinasion ti Mountain Province State Polytechnic College, Bontoc Campus, Bontoc, Mountain Province.

Maipaay pay ti nasao a programa iti San Fernando City, La Union inton Hulio 9 babaen ti koordinasion ti Central Ilocandia College of Science and Technology, San Fernando City; inton Hulio 9 met laeng iti  Laoag City, Ilocos Norte babaen ti koordinasion ti Mariano Marcos State University-Laoag City; ken inton Hulio 10 iti Vigan City, Ilocos Sur babaen ti koordinasion ti University of Northern Philippines, Vigan City.

Karaman kadagiti maipaay a serbisio ti pannakaproseso ti aplikasion para iti licensure examinations ti Teachers, Nurses, Criminologists, Agricultural  Engineers, Vet Med, Med Tech,  Electrical Engineers, Geodetic Engineers, CPA); pannakaproseso ti renewal ti ID/license; pannakaproseso ti inisial a rehistrasion dagiti karuruar nga examinees; pannakayisio ti Certifications of Good Standing; ken pannakaruk-at dagiti unclaimed ID/license.#