Salaysay: Precautionary measures ti Simbaan Katolika kontra iti COVID-19 — Tawid News Magazine - Weekly Ilocos News đź“°

Precautionary measures ti Simbaan Katolika kontra iti COVID-19

St Paul Cathedral, Vigan City, Ilocos Sur

MAKIKAYSA ti Simbaan Katolika iti sangalubongan kadagiti iyetnag a pagallagadan dagiti gobierno iti nagduduma a pagilian iti sangalubongan tapno malapdan ti panagsaknap ti Corona Virus 2019 (COVID-19) nga indeklaran ti World HealthO Organization a global pandemic a nangapektaren iti nasurok a 200,000 ken nakatayanen dagiti nasurok a 10,000 a biag.

Sadiay Roma, Italia, manipud idi kimmalay-at ti bilang dagiti positibo iti COVID-19 iti dayta a pagilian, indeklarar ni Papa Francisco, mangidaulo ti Iglesia Katolika ti pannakaisardeng pay laeng dagiti panagbisita ken naindaklan a religious gatherings iti Vatican. Kabayatan ti lockdown iti Italia, temporario a naiserra dagiti simbaan, ken naisardeng dagiti Misa nga atenderan dagiti adu a Katoliko.

Adu dagiti nasdaaw iti kellaat a panagraira ti COVID-19 iti Italia a nagbalinen nga epicenter ti virus iti Europa, kabayatan a naipadamag a nalapdanen ti panagadu dagiti naapektaran sadiay Wuhan City, Hubei, China a naggapuan ti virus.

Iti panagadu dagiti naapektaran iti Italia a sentro ti Kristianismo – Katolisismo iti lubong, kiniddaw ni Papa Francisco nga iti kangitingit ti panagraira ti virus iti nagduduma a pagilian ket agkaykaysa koma dagiti tattao iti amin a pammati tapno mapasardengen ti panagsaknap ti virus. Inggunamgunamna kadagiti Katoliko nga ad-adda pay a patibkerenda ti pammatida iti Dios ken agbalinda a saksi ti kinamanagayat ken kinamanangaasi ni Kristo. Inawis ti Santo Papa nga ita a tiempo ti Kuaresma ken kadagsen ti problema ti COVID-19 ket ipapuso dagiti Katoliko nga agtaklin ken agkamang ken ni Apo Jesukristo ket itimpuyogda dagiti amin a rigat a sagsagabaenda iti panagtutuok ken ipapatayna iti krus tapno ispalenna iti basol ti sangalubongan.

Ditoy Pilipinas, kalpasan ti pannakatakuat ti kaadda ti nagpositibo iti COVID-19 ket addan dagiti preventive measures nga inyetnag ti Catholic Bishops’ Conference of the Philippines kabayatan ti plenaria asembleada itay Enero 2020. Impaulogdan dagiti preventive measures kontra ti COVID-19 a suroten dagiti arkidiosesis, diosesis, apostolic vicariate, parokia ken amin nga institusion iti Simbaan Katolika. Naimandar ti saan pay laeng a panagiiniggem iti ima dagiti makimisa kabayatan ti pannakararag iti “Amami;” saan a panaglalamano, panagiinnabrasa ken panagbesobeso kabayatan ti panagkablaaw iti kappia; ken saan a panagpaisubo iti Nasagraduan a Tinapay kabayatan ti panangawat ti Sakramento ti Komunion. Naimandar pay ti saan a panagisawsaw iti ramay kadagiti pagbenditaan iti uneg dagiti simbaan, ken saan pay laeng a panagagek ken panagpunas kadagiti narelihiosuan nga imahen. Naibilin met ti regular a pannakadalus ken disinfection dagiti uneg ken arubayan dagiti simbaan, ken pannakaikabil ti abbong a lupot dagiti pagkompesaran. Idi Mierkules Kurkurus, saanen a nakurusan dagiti muging dagiti nakimisa, ngem nawakiwakan laengen iti dapo dagiti kuppokuppoda. Iti pannakalana dagiti masaksakit, babbaket ken lallakay, ket naibilin ti pannakalisi iti direkta a pannakasagid dagiti mugingda ket nausar ti kapas.

Nagduduma met a pagannurotan nga impaulog dagiti arsobispo ken obispo kadagiti masakupanda nga arkidiosesis ken diosesis kabayatan ti idadagsen ti problema ti pannakayakar ti COVID-19 iti Pilipinas, ken indeklarar ni Presidente Rodrigo Duterte ti community quarantine iti Metro Manila, kalpasanna, ti enhanced community quarantine iti intero a Luzon.

Ditoy Arkidiosesis ti Nueva Segovia wenno iti Ilocos Sur, makikaysa ti Simbaan Katolika kadagiti pagannurotan nga impaulog ti National Government ken Provincial Government iti pannakaideklarar ti enhanced community quarantine ti intero a Luzon.

Inyetnagen ni Arsobispo Marlo M. Peralta babaen ti circular dagiti pagannurotan dagiti parokia ken institusion ti Simbaan kas pannakitimpuyog iti gobierno tapno malapdan ti pannakayakar ti COVID-19 iti Ilocos Sur.

Manipud idi Marso 17, 2020 agingga inton Abril 14, 2020 ket nasuspender ti serrek dagiti agtatatrabaho kadagiti Church offices agraman dagiti eskuela iti salinong ti Nueva Segovia Archdiocesan Catholic Schools iti walo nga ili ti Ilocos Sur.

Suspendido met ti pannakaisayangkat ti Nasantuan a Misa kadagiti barangay iti amin nga ili ken siudad ti Ilocos Sur, ken ipaayan ti Arsobispo ti “dispensation” dagiti saan a makimisa iti simbaan iti Domingo. Naimandar ti panagtalinaed a silulukat dagiti simbaan iti inaldaw ken maipakat ti regular a disinfection ken precautionary measures. Maigunamgunam kadagiti Katoliko a makimisada iti radio, telebision ken social media.

Naibilin met ti pannakaisanud dagiti buniag ken kasar kalpasan ti enhanced community quarantine. Mapalubosan met dagiti Misa ti Pumpon ngem malimitaran laeng dagiti makipamumpon iti saan a nasurok a 50 a kapamilia ken kabagian ti maitabon.

Maasikaso met ti pannakalana dagiti masakit ngem nasken ti panangipakat ti ministro iti nainget a precautionary measures.

Maidarirag met nga iti Biernes ita a Kuaresma ket iwayat dagiti Katoliko iti panagayuno, pananglimos ken panagkararag tapno malapdan ti pannakayakar ti COVID-19. Naimandar ti pannakapatit dagiti kampana kadagiti simbaan iti alas-otso iti bigat a senial ti aggigiddan a panagadorasion dagiti parokia, oratories ken religious houses. Mapatit manen dagiti kampana iti alas-dose wenno tengnga ti aldaw, ken iti alas-otso iti rabii.

Nakansel metten ti communal praying ti oratio imperata, ken dagiti Misa kadagiti piesta ti barangay ken ili.  

Naibilin met nga iti panagkolekta ti tithings kadagiti parokia ket mangiwayatda kadagiti precautionary measures dagiti agkolekta. Manamnama ti pannakaipaulogto manen ti nayon a precautionary measures kabayatan ti Semana Santa.

Ita a tiempo a kangitingit ti parikut ti panagraira ti COVID-19 a nairana a Tiempo ti Kuaresma, ikagumaan koma dagiti Kristiano nangruna dagiti Katoliko a paunegen ken patibkeren ti pammatida iti Dios. Uray no adu dagiti gannuat nga ipakpakat ti gobierno ken Simbaan, saan koma a makalapped kadagiti tattao nga agkamang iti Dios babaen iti naimpapusuan a panagkararag iti amin a lugar ket dawatenda ti kaasi ti Apo Jesukristo nga isu ti mangilisi ken mangispal kadagiti tattao iti daytoy a mapagbutbutngan a virus ken sakit.