Footer

Presidente ti Madrigal Foundation, naideklara nga adopted daughter ti Ilocos Sur

VIGAN CITY, Ilocos Sur -Inaprobaran ti sangguniang panlalawigan ti resolusion a mangideklara kas adopted daughter ti Ilocos Sur ti maysa a naipangruna nga esponsor kadagiti nadumaduma a medical mission a naisayangkat iti probinsia iti daytoy a tawen.

Sagudayen ti nasao a resolusion nga indatag ni Bokala Chuchi Purisima bayat ti session itay Nob. 21 a maideklara nga adopted daughter ti probinsia ni Lalaine Madrigal, presidente ti Madrigal Foundation, gapu iti dekalidad a serbisio nga impaay ti nasao a foundation kadagiti mission medikal iti Burgos, Sta. Catalina, San Juan, Banayoyo ken Santa nga insayangkat ti gobierno probinsial a nakaipaayan iti libre a serbisio ti salun-at kadagiti marigrigat a residente iti probinsia.

Itay Nob. 19, balligi ti medical ken dental nga indanon ti provincial government iti Banayoyo, maysa nga upland municipality, a nakabenepisiaran iti nakurang sangaribu a residente.

Simmaruno itay Nob. 20 ti medical ken surgical mission   nga insayangkat met laeng ti gobierno probinsial iti Santa, Ilocos Sur a nakabenepisiaran ti aganay 1,600 nga umili.

Iti immun-una nga interbiona iti media, kinuna ni Singson a dakkel ti akem ni  Lalaine Madrigal iti agtultuloy a panagballigi dagiti medical mission nga isaysayangkat ti gobierno probinsial babaen ti programa a Joint Community Service (JCS) ken iti pannakitinnulong ti Madrigal Foundation..

“Libre amin, awan ti gastosen dagiti umili,” kinuna ni Singson  idinto nga inyunay-unayna nga ipapaay ti Madrigal Foundation dagiti libre nga agas.

“Agtultuloy daytoy a programa tapno maikkan amin nga umili ti Ilocos Sur iti serbisio iti salun-at,” kinuna ni Singson sana innayon nga addan nasurok sangapulo nga ili a nakaisayangkatan dagiti medical mission. 

Kinuna ni Singson a maysa a parabur manipud iti langit ti pannakaam-ammona ken ni Madrigal idi Agosto ta manipud idi, saanen a napugsat ti panagkadua ti gobierno probinsial ken ti Madrigal Foundation kadagiti serbisio medikal.

Kinunana nga instrumento pay ni Madrigal iti pannakagatang ti walo nga ambulansia para iti Gabriela Silang General Hospital ken amin a district hospital ti Ilocos Sur.

Kinuna met ni Gob. Deogracias Victor “DV” Savellano a dakkel a banag iti biang ti probinsia ti kaadda ti Madrigal Foundation a boluntario a mangipaay iti ayat ken tulongda kadagiti proyekto ti Ilocos Sur nangruna iti pakaseknan ti salun-at.

Nupay kasta, kinuna ni Savellano a saan a rumbeng nga abusuen no di ilalaen ti panagtalek nga ipapaay dagiti kas ken ni Madrigal iti gobierno probinsial.

“Ti laeng makatulong ti talaga nga adda iti panunotko” kinuna met ni Lalaine Madrigal idinto nga innayonna a pakaragsakanna ti agbalin a paset iti puso dagiti Ilokano.

Inkarina pay ti tulongna agingga a maileppas a danonen dagiti medical mission dagiti 32 nga ili ken 2 a siudad ti probinsia.

Kinuna ni Singson a maiyawat ti pammadayaw ken ni Madrigal inton Enero a panagpiesta ti Vigan City.#