Presio ti bakuna ken nagduduma a kontrobersia bayat ti pandemia

NAPUKAW kadin ti konsensia dagiti dadduma nga opisial ti gobierno ta uray iti panawen ti pandemia ti Coronavirus 2019 nga agsagsagaba iti nakaro a rigat dagiti kaaduan nga umili ket adda dagiti anomalia iti pannakamanehar ti pondo?

Agatap dagiti umili nga uray ti presio ti maangkat a bakuna kontra Covid-19 ket adda manggandat a maipangato. No pudno dayta ket nasken a malappedan, tapno ti umno a presio ti masurot ket magatang dagiti natalged ken nasamay a bakuna ken ad-adu nga umili dagiti mabenepisiaran.

Adu dagiti maburburtiaan kadagiti alegasion kabayatan ti bista iti Senado maipanggep ti Covid-19 Vaccination Program ti gobierno. Agatap dagiti umili iti kinatalged ken kinasamay dagiti bakuna a gatangen ti gobierno ta uray pay ti pudno a presioda ket mailimlimed iti publiko. Agatapda a kasla ipangpangruna ti gobierno ti bakuna nga aramid ti China iti laksid nga adu dagiti agamak gapu iti padasda kadagiti produkto a nababa ti kalidadna a naggapu iti dayta a pagilian.

Adda dagiti senador a masmasdaaw a kasla mapabpaboran ti bakuna a Sinovac a partuat ti kompania iti China a naireport a nababbaba nga “efficacy,” nanginngina, ken naudi pay a nagaplikar iti “emergency use authorization” iti Foods and Drugs Administrasion, ngem dagiti bakuna a Pfizer – BionTech a nalatak a kompania ti United States of America, AstraZeneca ti United Kingdom,. Dinillaw ni Senador Panfilo Lacson ti agparparang a kaykayat a gatangen ti gobierno ti Sinovac ngem dagiti dadduma a bakuna gapu kadagiti nadakamat a rason. Kayat pay a maammuan dagiti senador ti pudno a presio dagiti bakuna tapno mapagkokomparada ngem saan a kayat nga irakurak ni Vaccine Czar Carlito Galvez Sr. ta mailabsing kano iti confidentiality agreement iti kompania ti bakuna a mangdadael iti negosasion.

Mabalinto kano laengen a mairakurak iti publiko ti presio dagiti bakuna kalpasan a mapirmaan dagiti kontrata.

Napateg a maamuan ti publiko ti pudno a presio dagiti bakuna sakbay ti pannakapirma dagiti kontrata tapno mapatalgedan a dagiti gatad ken kalidad dagiti bakuna ket isu ti kasayaatan para ti interes ti gobierno ken dagiti umili.

Binabalaw ni Presidente Rodrigo Duterte iti Senado a manglaplapped iti nadaras a negosasion ti pannakaangkat ti bakuna kabayatan ti pannakaisayangkat ti Senate hearing. Kinaritna pay a makipagkita kenkuana ti saanna nga innaganan a Senador a mangiparparipirip nga adda “overpricing” iti anti-Covid vaccines. Impasingkedna nga awan ti mapasamak a kurapsion iti pannakaangkat ti bakuna.

Manamnama nga ita a Pebrero ket sumangpetton iti Pilipinas dagiti pakauna a bakuna a Sinovac ken Pfizer ket marugianton ti panagbakuna iti Metro Manila.

Kalaksidan iti isyu ti bakuna, adu a kontrobersia dagiti timpuar kabayatan ti pandemia a mamagbalin kadagiti umili nga agatap a nagbalinen a gapu ti panguartaan ti Covid-19.

Itay nabiit, inrakurak ni Duterte ti nagan dagiti adu a kapitan ti barangay manipud iti nagduduma a lugar a napilaan iti kaso ken nasupenso gapu ti mapapati a maanomalia a pannakaiwaras ti pondo ti Social Amerioration Program, ti ayuda para kadagiti marigrigat kabayatan ti panagdalan ti Luzon iti enhanced community quarantine wenno lockdown.

Inungtan ken pagpalusolosen pay ni Duterte dagiti kurap nga opisial ti Department of Social Welfare and Development gapu iti mapapti nga anomalia iti pannakaipaay dagiti ayuda kadagiti marigrigat ken biktima dagiti kalamidad

Itay 2020, pinaglusulos ni Duterte dagiti nangato nga opisial ti Philippine Health Insurance Corporation a mapapati nga adda pannakainaigna iti maanomalia a pannakagasto dagiti binillion a pondo ti ahensia. Naidarumen ni sigud a Philhealth President Ricardo Morales ken dadduma pay nga opisial ti ahensia. Napasamak dagita nga aksion kalpasan ti panagimbestigar ti Senado iti kaso ti Philhealth.

Mairaman kadagiti kontrobersia ti Philhealth a nagkumplotan dagiti opisial ti ahensia ken dagiti hospital administrators ket ti pinagparangda a kaso ti Covid-19 dagiti kadawyan a sakit dagiti pasiente tapno makakolektada iti ad-adu nga amang a bayad.

Adu pay dagiti alegasion ti “overpricing” ti presio dagiti nagatang a personal protective equipments, RT / PCR test kits a kasapulan iti Covid-19 response. Adu met ti reklamo dagiti health workers a nagbayag ti pannakaited dagiti allowance ken hazards pay-da. Nagadu pay ti reklamo dagiti kapamilia dagiti natay a health workers gapu iti panangtamingda kadagiti pasiente, iti nabayag a pannakaalada kadagiti benepisioda.

Adun a pondo ti nausar ken agtultuloy a gasgastosen ti gobierno iti Covid-19, ket mapilitan nga agutang latta ti administrasion kadagiti foreign financial institutions tapno adda pangsupusop ti P4.5 Trillion 2021 National Budget. Dakkel a porsiento ti National Budget ti nayalokar para ti Covid-19 response nangruna iti pannakagatang ti bakuna. Nailumlomen ti Pilipinas iti utang ket rebbengna a masaluadan dagiti pondo ti gobierno tapno mausarda iti pudno a nakaisangratanda, saan ketdi nga ibulbulsa laeng dagiti opisial. Ipaspasindayag ni Duterte ti gannuatna a mangpunas ti kurapsion iti gobierno kabayatan ti administrasionna. Pudno nga addan dagiti opisial a naikkat gapu iti alegasion ti kurapsion, ngem ad-adu pay dagiti nagtalinaed iti posision iti laksid dagiti mapapati a pannakainaigda kadagiti maanomalia a pannakagasto ti pondo ti gobierno a gapu ti ad-adda pay panagrigat dagiti Pilipino.