Presio ti kamatis a gatangen ti ISTPP, natuonan iti P.50 kada kilo

SANTA, Ilocos Sur – Tapno maikkan iti dakdakkel nga insentibo dagiti mannalon a mangpaadu iti apitda a kamatis, ninayonan ti Ilocos Sur Tomato Paste Plant iti P.50 ti paggatangna iti daytoy a produkto kada kilo.

Kalpasan ti panangaprobar ni Vice Gov. Deogracias Victor Savellano iti kiddaw dagiti agmulmula iti kamatis a manayonan ti presio ti produktoda, agbalinen a P3.00 ti presio ti kamatis kada kilo iti masungad a panagkakamatis.

Iti daytoy a baro a presio ti kamatis, mataginayonan met laeng ti P.20 nga insentibo a maited kadagiti mannalon no aglakoda iti planta iti nasursurok ngem 40,000 kilos a kamatis, ken sabali pay a P.20 no nasursurok ngem 50,000 kilos ti ilakoda nga apitda a kamatis iti planta.

Ingngato pay ni Savellano ti maipautang a cash kadagiti mannalon iti P15,000 manipud iti P12,000 nga impautangda iti napalabas a panagkakamatis.

No agmula iti kamatis ti mannalon iti maysa nga ektaria, makautang iti P45,000 nga awan ti interesna ket P12,000 ti maited a cash.

Puntiria ti mangimaton iti Ilocos Sur Tomato Paste Plant a makapamulada iti walo gasut nga ektaria iti kamatis tapno magun-odda ti puntiriada a produksion para iti nasao a planta.

Segun ken ni Engineer Mateo, baro a general manager ti ISTPP, naabutdan ti 600 nga ektaria a pamulaanda iti kamatis ngem puntiriada pay ti kanayonan a 200 ektaria tapno agbalin a 800 ektaria ti mapamulaan iti kamatis tapno magun-od ti planta ti lima a milion a kilos a pasta a partuaten ti planta nga ilako.

Mapattapatta a makapartuat ti walo kilo a kamatis iti maysa a kilo a pasta.

Sabali pay a reklamo dagiti mannalon ti nanginngina a paggatang ti planta ti pasta iti Ilocos Norte iti kamatis.

Segun iti nasao a mannalon, aggatang ti nasao a planta iti P3.50 kada kilo.

Ngem inlawlawag ti manager a nupay agpayso a nanginngina ti paggatang ti nasao a planta, dakdakkel met ti interes a bayadan dagiti mannalon iti utangenda iti planta para iti gastuenda iti panagmulada iti kamatis.

Mapapati a 15% ti interes a singiren ti nasao a planta kadagiti contract growers idinto nga awan ti interes ti utangen dagiti agmulmula iti kamatis iti ISTPP.#