Presio ti karne iti public market, awan umdas a rason a maipangato, duktal iti public hearing

VIGAN CITY, Ilocos Sur – Kinuna ti maysa a konsehal ken beterinario ditoy siudad nga awan ti umdas a rason tapno maipangato ti presio ti karne ti baboy ken dadduma pay a karne ditoy siudad.

Imbatad daytoy ni Konsehal Henry Formoso kas reaksionna iti petision ti grupo dagiti aglaklako iti karne ditoy siudad a mangipangato iti presio ti karne ti baboy, baka, ken nuang a mailako iti tiendaan publiko ditoy siudad.

Kinuna ni Formoso, chairman ti market ken slaughterhouse ken economic enterprises nga awan ti umdas a rason tapno mapatgan ti petision ti Association of Meat Vendors ti Vigan public market a maipangato ti presio dagitoy a tagilako, nangruna ti baboy, iti tiendaan publiko agsipud ta saan met a nagpangato ti presio ti liveweight a baboy ditoy siudad.

Nangipila ti nasao a grupo iti petision iti sangguniang panlungsod a maipangato ti presio ti karne ti baboy itay nabiit.

Iti agdama, P170 kada kilo ti presio ti baboy a mailaklako iti tiendaan publiko.

Ngem segun ken ni City Veterinarian Liborio Arca, saan a nagpangato ti presio ti liveweight a baboy iti siudad manipud pay idi kanikadua a tawen a pannakaipangato ti presio daytoy.

Naduktalan pay ti dua a komite ti sangguniang panlungsod bayat ti insayangkatda a public hearing a nababbaba ti presio ti liveweight a baboy ditoy siudad no maikumpara iti presio dagitoy met la a tagilako iti sabali nga ili ditoy probinsia ken mapapati nga ad-adda nga iti ruar ti siudad ti paggatangan dagiti negosiante kadagiti maparti a baboy.

Saan nga immatendar ti presidente ti Meat Vendors Association iti nasao a public hearing.

Idi kanikadua a tawen, kinastigo ti sangguniang panlungsod ti grupo dagiti aglaklako iti karne iti tiendaan publiko gapu iti kellaat lattan a panangipangatoda ti presio dagitoy a tagilakoda iti baet a di pay naaprobaran ti petisionda iti nasao a pagpandayan-linteg.

Nagballaag pay ni Vice Mayor Ranches idi ken konsehal itan a maidarum ti grupo iti panaglabsingda iti linteg gapu iti daytoy nga inaramidda., Nupay kasta, inaprobaran met la ti sangguniang panlungsod ti petision ti grupo kalpasan nga imbaba dagitoy ti presio ti lakoda a karne iti tiendaan.#