Footer

Presio ti lasona, bawang iti Ilokos, bumabbaba: aneng-eng mannalon

VIGAN CITY – Uray ti lasona ken bawang, nababan ti presioda isu a bumasbassiten ti produksion dagitoy a produkto iti Ilokos.

Daytoy ti kangrunaan a limtuad bayat ti  Ilocoswide Onion and Garlic Congress a naangay  itay Nob. 20 iti provincial capitol ditoy tapno matratar dagiti problema dagiti agmulmula iti lasona ken bawang iti Ilokos.

Iti panagbitla ni Savellano, kinunana a “dumakdakkel ti problema ti industria ti lasona ken bawang”, saan laeng iti probinsia no di pay iti kabangibangna a probinsia ket “masapul a mapagpapatanganen  no kayattayo pay a pagbiagen ti industriatayo”.

Nadakamat pay ni Savellano nga adun dagiti nakapatpatangna a mannalon ket naammuanna nga adu dagiti problemada, magungundawayanda ken bassit ti paglakuanda iti bawang ken lasona.

Nasurok dua gasut nga agmulmula iti lasona ken bawang iti probinsia ti Ilocos Sur ken sumagmamano nga ili iti Ilocos Norte a pakaibilangan ti Batac City, Currimao, Paoay, Pinili, San Nicolas, Sarrat ken Pasuquin dagiti dimmar-ay iti daytoy kaunaan a summit nga initiatibo ni Savellano a kangrunaan a panggepna ti  pannakapapigsa dagitoy nga industria.

Karaman a timmabuno iti nasao a Congress da Atty. Cipriano Santiago, Regional Executive Director iti Department of Agriculture, Region 1, Dr. Rene Rafael C. Espino – Program Director GMA-HVCC, ken Provincial Agriculturist Teofilo Quintal.

Kinuna ni Savellano a saan nga agpatingga laeng ti provincial government iti panagimulaan iti lasona ken bawang, “masapul a mapagpapatangantayo ti panangilakoyo iti produktoyo iti napintas a presio.”

Kinuna ti gobernador a naangay ti Congress “tapno sangsangkamaysa a pagtitinnulongantayo a resolbaren daytoy a problema.”

“…Masapul a sangsangkamaysatayo tapno napigpigsa ti bosestayo…,” inyunay-unay ni Savellano.

Impakaammo ni Savellano nga adda innala ti gobierno probinsial a sarilina a bagsakan iti Manila a diretso a pagilakuan dagiti mannalon  ken adda libre a paggiananda iti kaaddada iti siudad tapno saanda a magundawayan iti presio dagiti produktoda.

Impalgak ni Savellano nga adda mafia iti Manila ket saanda a sigida nga  aggatang tapno ibaba dagiti mannalon ti presioda.

Naaramid bayat ti Congress ti maysa a manipesto a pinirmaan dagiti mannalon a maiturong ken ni Pres. Gloria Macapagal-Arroyo ken ni Agriculture Secretary Arthur Yap a nangkiddawanda a mapawilan ti importasion ti bawang ken lasona a kangrunaan a gapu iti panaglaka ti presio dagitoy a produkto.#