Price tag dagiti tagilako, naipakat

SAN JUAN, Ilocos Sur – Tapno saan a magundawayan dagiti umili iti sanguanan ti naglabas a kalamidad, nairiing ti pannakaikabil ti price tag dagiti tagilako iti tiendaan publiko ditoy.

Kinuna ni Konsehal Cresencio Valle nga ipakat ti Price Monitoring Local Committee Board ti pannakaikabil ti price tag kadagiti prime commodities tapno mamonitor ti presio dagitoy.

Segun ken ni Valle, kayat ti lokal a gobierno ditoy a maikabil ti price tag kadagiti kangrunaan a tagilako iti tiendaan tapno makita ti panaggaraw ti presio iti sanguanan ti nasagrap a didigra ti probinsia a ginubuay ti bagyo a pakairamanan daytoy nga ili.

Kas sagudayen ti Price Tag Law wenno RA 7394 maikkan iti price tag dagiti tagilako tapno maikkan dagiti aggatang iti naan-anay nga impormasion ken adda pagibasaranda a mamagdilig iti presio dagiti tagilako kadagiti pagtagilakuan ken tapno maikkatan ti panagtitinnawar a maysa a pakadadaelan iti oras, kuarta ken enerhia para iti aggatang ken iti aglako.#