Price tag law, naipaganetget

CABUGAO, Ilocos Sur – Kas pannakaipaganetget ti Price Tag Law, addan naipasdek a bulletin board a nakailanadan ti presio dagiti magatgatang iti tiendaan ditoy nga ili.

Adda metten price list dagiti lames ken dagiti groseria a mailaklako kadagiti pagtagilakuan iti tiendaan.

Itay nabiit, nangisayangkat ti Department of Trade and Industry iti panangidaulo ni Annabel Colangco ken iti opisina ti agrikultura babaen ti pannakikammayyet dagiti mangimaton iti tiendaan iti occular inspection iti tiendaan, nangruna iti fish and meat section ken iti groseriaan tapno monitorenda ti presio dagiti magatgatang ditoy.

Sinukimat pay ti grupo dagiti pagtimbangan ken pagkiloan dagiti business establishments tapno makita no husto met laeng ti kalibrasionna tapno saan a masuitik dagiti aggatgatang.#