Footer

PRO1 kadagiti umili: irehistroyon kolorum nga armasyo

SAN FERNANDO CITY – Kas panangiyimplementarna iti programa ti amnestia ti armas ni Pres. Gloria Macapagal-Arroyo, indagadag ti police regional office ditoy kadagiti umili nga irehistrodan dagiti armasda a saan a lisensiado.

Kanaig daytoy, impakaammo ti Firearms Explosives, Security Agency and Guards Section (FESAGS) nga agirehistrodan kadagiti loose firearms kas panangiyimplementarda iti Executive Order 585-5 a pinirmaan ni Pres. Arroyo idi Agosto 28 daytoy a tawen.

Saklawen ti nasao nga executive order  ti firearm amnesty program a mangited iti gundaway kadagiti agikut kadagiti kolorum nga armas a mangirehistro kadagitoy.

Nagepekto ti EO 585-A itay Nobiembre 15 ket agpatingga inton Nobiembre 14 inton umay a tawen.

Sagudayen ti nasao a paglintegan a dagiti laeng umili a Filipino nga agtawen iti 21 ti makairehistro iti kolorum nga armasda.

Dagiti sumaganad dagiti mabalin nga irehistro kas sagudayen ti EO 585-5: handguns (pistol/revolvers), cal .22 agingga iti .357; shotguns (all gauges); rifle, cal .22; ken dagiti sabali pay a low-powered firearms.

Dagiti high powered rifles ket mairehistro iti case to case basis ken babaen ti approval ti hepe ti PNP, segun iti FESAGS.

Kabayatanna, imbilin ni PNP regional director Police Senior Supt. Leopoldo N. Bataoil kadagiti provincial directors iti panangiwayatda iti nainget a kampania maikontra kadagiti kotong cops, a pakairamanan dagiti flying squad ti Land  Transportation Office ken traffic officers kadagiti local government units.

Imbilin ni Bataoil ti pannakimiting dagiti kapolisan kadagiti local chief executives para iti nasao a kampania maikontra kadagiti kotong cops.

Sagudayen pay ti nasao a pammilin ti panagreport dagiti provincial directors ken ni Bataoil iti linawas mainaig iti daytoy a kampania.#