Footer

Problema dagiti lumugar, maidanonen iti gobernador babaen iti text messages

CABUGAO, Ilocos Sur –  Aniaman nga oras, nakasagana nga umawat iti impormasion ti gobernador pakasekan ti probinsia.

Impalgak ni Gov. Deogracias Victor “DV” Savellano nga inrusatna daytoy a programa babaen ti 24/7 service wenno 24 nga oras/pito nga aldaw a serbisio tapno nadardaras a maaksionanna dagiti problema nga idanon dagiti agindeg iti kada ili.

Kinuna ti gobernador a mabalinen nga idanon dagiti agindeg babaen ti text messaging  dagiti mapaspasamak iti lugarda, kasta met kadagiti problemada kadagiti sumaganad a numero: 09188821111 (Globe);  09178080330, (Sun Cellular);  ken  09228112112 (Smart).

Kinuna ti gobernador a babaen kadagitoy  a numero, siwawaya dagiti kaprobinsiaan a mangipatulod iti mensahe, obserbasion, ken no aniaman a suhestion para iti pagsayaatan ti sibubukel a probinsia.

Innayonna pay a kalaksidan iti email babaen ti panaglog-in iti Ilocos Sur website, agserbi dagiti pagtawagan a numero a rangtay iti nagbaetan ti gobyerno probinsial ken dagiti umili kangrunaan dagiti agnaed iti upland municipalities tapno nalaklaka a maammuan dagiti kiddaw ken problema ti komunidad.

Kabayatanna, linuktan pay ti gobierno probinsial ti websitena a www.ilocossur.com.ph tapno adda pakaammuan kadagiti napateg nga impormasion ken dagiti programa ken proyekto ti gobierno ditoy.

Paset pay ti nasao a website ti Forum Site a pangitedan dagiti bumisita ditoy iti komentario ken singasingda para iti pagsayaatan ti probinsia.#