Footer

Problema dagiti umili, maidanonen iti gobernador babaen iti text

CABUGAO, Ilocos Sur – Kinuna ni Gov. Deogracias Victor “DV” Savellano a nanglukat iti text line para iti nadardaras a pannakaidanon kenkuana dagiti programa ken problema dagiti kailianna.

“Toy governoryo… ni Apo DV, ket just a text away to anybody in the province of Ilocos Sur,” kinuna ni Savellano.

Innayon ti gobernador a nagaplayen iti liniana para iti Smart, Globe ken Sun Cellular tapno awan ti busbosen dagiti agtext kenkuana mainaig kadagiti problemada a kasapulan a maikkan iti atension.

Kinunana a napanunotanna daytoy “tapno uray dagiti adda iti kaadaywan a sitio iti Cervantes ket mabalinda latta nga i-text ti problema, wenno dagiti singasingda, produkto ken amin-amin a banag.”

Inlawlawagna a medio high-tech itan ti panagserbina, tapno madanonna amin dagiti kaprobinsiaanna.

“Kas gobernador ket annakkayo aminen… isu a kitkitaek ti pagsiaatanyo,” kinuna ni Savellano.

Nadakamat pay ti gobernador nga adda metten email addressna tapno maaddaan access kenkuana dagiti addaan computer babaen iti internet.

“Mamatiak a through texting, nadardaras ti idadanon kaniak dagiti problema, suggestions ken recommendations manipud kadagiti kakailian, uray addada iti nasulinek a lugar ti probinsia ket padasek a sungbatan ken maikkan iti solusion dagitoy a problema,” kinuna ni Savellano.