Footer

Production manager idi, ita maysan a mannalon (Umuna a paset)

Sigud nga agricultural production manager iti Ilocos Sur Tomato Paste Plant agingga iti panagserra daytoy idi 2008, mabalinna koma ti agtrabaho iti sabali pay a kompania a makasapul iti kas kenkuana a graduado iti BS Agricultural Engineeering ta agtawen laeng  iti uppat a pulo ket lima ngem kinaykayatnan a sinukay ti bukodna a talon. Dayta ni Felidel Vita-Aquino ti Caronoan, San Juan, Ilocos Sur.

Pinasetpasetna ti 1.5 ektaria a dagana iti asideg ti pagtaenganda ket rinugianna a minulaan iti nadumaduma a natnateng kas iti paria, kamatis, ken papaya a binallaballaetanna iti sili nga aruoy-oy ken karabasa iti sirok kas intercrop. Iti met maysa a paset, nagpatakder iti piggery ket nagtaraken iti sangapulo a pagannakan a baboy  (takong) ket dagiti maiyanak dagitoy ti tinarakenna met kas fattening. Ita, addan nasurok limapulo a fattening ni Manang Felidel a tartaraknenna ken dagiti katulonganna iti farm. Adda metten bukodna a bula nga us-usarenna a a mangdakep kadagiti takong a saanen a masapul pay nga agbayad iti bula iti kanito nga adda agmaya kadagiti tarakenna.

Tapno makainut iti gastos, isu metten ti nagaramid iti bukodna a pagpakan kadagiti tarakenna a baboy. Babaen ti panamagtitiponna kadagiti kangrunaan a sangkap iti panagaramid iti feeds kas iti tuyo, corn meal, soya meal, asin, apog, tagapulot ken dadduma pay a ramen, daytoyen ti pagpakanna kadagiti baboy iti inaldaw. Segun ken ni Manang Felidel, umabot iti P250-P300 ti laklakaan ti maysa a sako ti homemade a feeds no ikumpara iti komersial a feeds. Kayatna a sawen addan nayon a ganansiana gapu iti panagaramidna iti bukodna a feeds. Malaksid iti dayta, awan ti madi nga angot ti rugit dagiti tarakenna nupay awan ti kalub ti 7 by 7 a metro ken dua a metro ti kaunegna a tangke a pinaaramidna a pakaurnongan dagiti rugit ken danum a pagdalus kadagiti kulongan.

Bayat  met ti panagtalonna, naduktalanna nga agkurang iti sustansia a zinc ti daga a mulmulaanna. Saan ngarud unay a napintas ti apitna kadagiti mulana a nateng. Ditoy a napanunotna nga ipadas a ti danum manipud iti septic tank ti rugit dagiti baboy ti usarenna a pagsibog tapno agserbi payen nga abono kadagiti nateng. Ti resulta? Nabaludbod dagiti nateng ket malaksid nga immadu, simmalun-at pay dagiti naibunga dagitoy. Kayatna ngarud a sawen nga addaan iti sustansia ti danum manipud iti tangke a masapul dagiti mula. Nayon manen a kita dayta para ken ni Manang Felidel ta saanen a  naggatang  pay ken nagusar  iti komersial a ganagan kadagiti natnatengna. Kaykayatda payen a gatangen dagiti produktona ta  maawagan metten  dagitoy iti organic vegetables.

Addaan met ni Manang Felidel iti bukod a nursery iti abay ti balayda.  Kinunana a dakkel ti maitulong daytoy ta makapagbunubon latta uray tiempo ti bagyo isu a nupay adda dagiti madadael a mulana no maduprak iti bagyo ti lugarda, adda madadaan nga isukatna no limmabasen daytoy.  Makauna ngarud nga agapit ta kasapulan pay dagiti dadduma a kalugaranna ti agpatubo iti bunubon sakbay a makapagmulada. Maysa pay a pagsayaatanna, makapagmula latta  iti kayatna a nateng uray off season wenno saanna a tiempo.  Ket gapu ta adda laeng ti nursery iti abay ti balayda, inaldaw a matartaripatona dagiti bunubon.

(Maigibusto)