Produkto Ti Ilocos Sur, nailako sadiay Manila

PASIG CITY – Naitandudo dagiti agduduma a produkto manipud kadagiti nadumaduma nga ili ti Ilocos Sur sadiay Metrowalk Commercial Complex, Pasig City bayat ti pannakaangay ti Maika-9 a Tawid ken Partuat Tourism and Trade Fair manipud Disiembre 14-20.

Uppat a pulo ket tallo a booth ti naipuesto a nakaipakitaan dagiti produkto a makan kas iti chichacorn, kalamay, royal bibingka, bagnet, longganisa, balikutsa, tagapulot, banana ken camote chips ken presko a natnateng, bawang ken lasona; mainum kas iti calamansi juice, ginger tea, arak manipud iti bugnay, tapey, suka ken abel Iloko, nadumaduma a furniture ken dadduma pay a tagilako.

Iti panglukat a programa, kinuna ni Gov. Luis “Chavit” Singson a daytoy Tawid ken Partuat Tourism and Trade Fair ti mangipakita iti naidumduma a kultura ken kinabaknang nga ikut ti probinsia nga Ilocos Sur gapu ta saan laeng a basta panaglako ti gagem daytoy a  panangipanda kadagiti produkto no di ket maaddaan pay iti gundaway dagiti aggatang a mangammo  kadagiti napipintas a  pagpasiaran iti probinsia.

“Sipapannakkelkami a mangiparang ditoy kadagiti produkto kasta metten a matulonganmi dagiti SMEs a mangipromot kadagiti aramidda,” kinuna ni Singson.

Kinuna met ni Vice Gov. DV Savellano a madadaan ti gobierno probinsial a makitinnulong kadagiti SMEs tapno makasabayda iti kalidad dagiti produkto manipud kadagiti sabali a probinsia.

“Mapigsa ti balubal iti merkado isu a masapul a nangato met ti kalidad ken napintas ti presentasion dagiti tagilakotayo tapno maguyugoy dagiti aggatang,” kinuna ti bise gobernador.

Kinuna ni Dept. of Agriculture Asec. Salvador Salacup, maysa kadagiti sangaili iti nasao a pasken, a pangworld class dagiti aramid dagiti exhibitors. Kangrunaan a dinayawna ti abel Iloko ken dagiti furnitures gapu iti pulido a pannakasangalda.

Nagbalin pay a tampok iti trade fair ti abel fashion show a nakaiparangan dagiti disenio ti Ilokano a fashion designer a ni Dita Sandico-Ong ken dagiti miembro ti Ilocos Sur Designers Guild. Ditoy a naipakita ti kina-versatile ti tela nga abel iti pannakaipakita dagiti disenio a mabalin nga usaren iti nadumaduma nga okasion.#