Project Isem, maisayangkat

VIGAN CITY – Maisayangkat manen ti Project Isem kas sagut ni Diputado ti Umuna a Distrito Ronald Singson kadagiti gusing ken ngongo ditoy probinsia iti daytoy masungad a panagkasangayna.

Maangay ti screening dagiti ngongo ken gusing nga agpaoperar inton Oktubre 25 ken maaramid ti operasion kadagiti nakapasa inton Nobiembre 6 ken 7.

Segun ken ni Singson, isagutna laengen kadagiti kailianna a ngongo ken gusing ti pannakaited iti operasion kadakuada imbes a gastuenna iti pannakaselebrar iti kasangayna inton Nobiembre 18.

Daytoy ti maikasangapulo a tawen nga ipapaay ni Singson ti Project Isem babaen ti pannakibinnulig ti Gabriela Silang General Hospital, Philippine Band of Mercy, Barangay Health Workers, ken ti DWRS Foundation.#