Komentario: Protesta ni Marcos kontra ken ni Robredo | Tawid News Magazine - Weekly Ilocos News 📰

Protesta ni Marcos kontra ken ni Robredo

NASUROKEN a kagudua ti innem a tawen a termino ti Bise Presidente ti Pilipinas ti naglabas, ngem aginggana ita ket saan pay a naresolbar ti nayuli a protesta kontra ken ni Vice President Maria Leonore “Leni” Robredo.

Nagipila iti Supreme Court nga agak-akem a Presidential Election Tribunal ni sigud a Senador Ferdinand “Bongbong” Marcos Jr. iti protesta kontra ken ni Robredo kalpasan ti eleksion idi May 2016 gapu ta 263,473 a botos laeng ti nakaarusanna iti rason a nasuitik isuna kadagiti sumagmamano a probinsia. Iti protesta ni Marcos, tallo dagiti “cause of action” nga impresentarna. Kinuestionaranna ti integridad ti automated election gapu kadagiti pannakataktak ti panagbotos gapu kadagiti nagpalia a vote counting machines, ken pannakataktak ti transmission iti resulta dagiti botos idi rabii ti eleksion.

Imbasuran dayta ti Supreme Court ta iti laksid dagiti poll automation glitches wenno pannakataktak iti sumagmamano nga oras iti panagbotos kadagiti presinto ken ti pannakai-transmit dagiti resulta dagiti botos ket saan a naapektaran ti integridad ti resulta ti eleksion.

Naipalaon pay iti protesta ni Marcos iti “second cause of action” a pannakasuitik iti pannakabilang dagiti botosna kadagiti pinilina a tallo a pilot provinces sadiay Camarines Sur, Iloilo ken Negros Oriental. Maibilang dagitoy a probinsia a baluarte ni Robredo ken ti kaasmangna iti Liberal Party a para presidente a ni Mar Roxas.

Idi 2016, ni Robredo ket naaddaan iti 1,493,517 a botos kadagitoy tallo a probinsia kontra iti 202,136 a botos ni Marcos.

Ngem imparuaren ti PET ti resulta ti manual recount kadagiti tallo a probinsia ket nanayonan pay iti 15,093 ti botos ni Robredo kontra ken ni Marcos. Nagbalin la ket ngaruden a 278,566 a botos ti nangitarayan ni Robredo ken ni Marcos iti national count.

Ngimmato ti bilang dagiti botos kabayatan iti manual recount ta nairamanen a naibilang dagiti balota a nababbaba ngem 50% shading threshold wenno kagudua ti pannaka-shade dagiti balota a saan a binasa ti vote counting machine idi kaaldawan ti eleksion ta naibilangda nga stray votes. Inkeddeng ti PET a maibilang dagiti 25% shading threshold a balota.

Kadagitoy tallo a probinsia, nagbalinen a 1,510,178 a botos ti nagun-od ni Robredo kontra iti 204,512 a botos ni Marcos. Naipangaton iti kadagupan a national votes ni Robredo a 14,436,337 votes, kontra iti total a botos ni Marcos a 14,157,771.

Naipalaon pay iti protesta ni Marcos iti “third cause of action” a pannakawaswas dagiti botos gapu iti nainsaknapan a panagsuitik kadagiti tallo a probinsia sadiay Mindanao – sadiay Lanao del Sur, Basilan ken Maguindanao.

Kadagitoy tallo a probinsia, nakagun-od ni Robredo iti 477,985 a kadagupan a botos kontra ken ni Marcos nga addaan iti 169,160 a botos. No saan a maibilang dagitoy a botos iti tallo a probinsia, mapunasen ti orihinal national count, ken agbalinton a 45,352 a botos ti pangitarayan ni Marcos ken ni Robredo.

Nagpetisionen ti kampo ni Robredo iti PET a maibasuran ti protesta ni Marcos kas mayataday iti Rule 65 iti 2010 PET rules a mangimanmandar a no awan ti “substantial recovery” kadagiti napili a 3 pilot provinces,” ket sigud a ma-dismiss ti protesta a saanen a maikkan iti konsiderasion dagiti dadduma a probinsia a naipalaon iti electoral protest.

Ngem nagpetision ti kampo ni Marcos ti panangikeddeng ti PET iti “third cause of action” wenno pannaka-nullify ti resulta ti botos kadagiti tallo a probinsia sadiay Mindanao.

Ngem kasano a mawaswas ti resulta ti eleksion kadagitoy tallo a probinsia ket nabayagen a naideklarar ken nagakem dagiti nangabak? Mawaswas ngarud ti botos dagiti kandidato a para Bise Presidente laeng? Ma-nullify ngarud met ti botos da Presidente Rodrigo Duterte, dagiti senador, ken dagiti lokal nga opisial?

Dandanin maibusen ti panawen ni Marcos a mangkamat ti pagbanagan ti protestana kontra ken ni Robredo ta agingga ita ket awan pay ti naan-anay a pangngeddeng ti PET wenno Supreme Court. Tallon a dati a Chief Justice ti nagdalanan ti protesta – da Maria Lourdes Sereno, Teresita De Castro, Lucas Bersamin – ngem awan ti nagbanaganna. Itan ta nadutokanen a baro a Chief Justice ni Diosdado Peralta a tubo ti Laoag City, Ilocos Norte, madesisionanto ngatan ti protesta ni Marcos?

Napaut unayen ti panangtratar ti PET iti protesta nga iti kabayagna ket agtultuloy a pagsisinaenna dagiti umili a nangibotos kada Robredo ken Marcos. Patien dagiti pasurot ken nangibotos kada Robredo ken Marcos a ti nangabak ket dagiti intandudoda idi eleksion. Nagraira la ket ngarud dagiti palso a damag ken agsusupadi a reaksion iti social media a pabor kadagiti imbotosda ken supsuportaranda.

Adun a gastos ken taktak iti panawen ti PET dagiti nabusbos iti pannakatratar ti protesta ni Marcos, imbes a mausarda koma kadagiti napateg a gannuat a makaipaay ti sapasap a pagimbagan dagiti umili.

Iti daytoy a panawen nga umad-adu dagiti agamak ken agdudua iti pudno a kasasaad ti salun-at ni Presidente Rodrigo Duterte, nasken a darasen koman ti PET a desisionan ti electoral protest ni Marcos kontra ken ni Robredo ta no mabakante ti puesto ti Presidente ket sumukat ti Bise Presidente a masapul nga awan ti panagdudua dagiti umili nga isu ti intandudo dagiti kaaduan a botante iti napalabas nga eleksion. ●