Footer

Protesta ni Rafanan, inaksionan ti Comelec Manila

VIGAN CITY – Kinuna ni naabak a gubernatorial candidate Efren “Rambo” Rafanan, Sr. nga addan sungbat ti Commission on Elections iti Manila mainaig iti impilana a protesta iti resulta ti eleksion para iti kinagobernador a nagbalubalanda ken ni nagtugawen a gobernador Deogracias Victor “DV” Savellano.

 “Addan pammilin a naawattayo manipud iti Comelec a maiwayat ti rebision dagiti balota kadagiti lugar a prinotestaantayo,” impakaammo ni Rafanan bayat ti programana iti radio.

Naiproklama ni Savellano a nangabak a gobernador iti probinsia idi Mayo 16 iti baet a kuinestionaran ti abogado ni Rafanan ti resulta iti eleksion iti sumagmamano nga ili ken siudad gapu iti alegasion a kaaddan ti iregularidad iti panagbilangan.

Itay Hulio 3, naangay ti turn-over ceremonies iti provincial capitol a nangipaimaan ni dati a Gov. Luis “Chavit” Singson iti rienda ti turay ti probinsia ken ni Savellano.

Ngem kanaig ti pammilin ti poll body ti panangideposito ni Rafanan iti P514,000 a maaramat iti pannakaibiahe dagiti ballot boxes iti Manila, gastuen dagiti polis, municipal treasurers ken Comelec officials a mangkuyog iti urna, pannakabilang dagiti balota a naggapu  kadagiti presinto dagiti naprotestaan nga ili ken siudad ken dadduma pay.

Segun iti dati a bokal, P900 ti magasto tunggal presinto a prinotestaanna. Agdagup iti nasurok a 400 amin dagiti naprotestaan a presinto.

Innayon ni Rafanan nga imbilin pay ti poll body a mangbirok iti 10 a revisors. Segun iti dati a bokal, suelduanna dagiti revisors iti P1,000 iti maysa nga aldaw.

Iti resulta ti eleksion idi Mayo 14 iti daytoy a tawen, nakagun-od ni Savellano iti 132,656 a butos idinto a 131,264 ti butos ni Rafanan wenno iti baet a 1,392 a butos.

Prinotestaan ni Rafanan ti resulta ti eleksion iti siudad ti Vigan ken Candon, ken dagiti ili ti Cabugao, Narvacan ken San Vicente.#