Footer

Provincial Government, 11 LGUs iti Ilocos Sur, napadayawan iti Seal of Good Local Governance

VIGAN CITY – Naindaklan a gapuanan dagiti mangidaulo ken agpapaay iti Provincial Government, iti Candon City ken Vigan City Government, ken dagiti siam a municipal government iti nagduduma nga ili ti Ilocos Sur iti panangpadayaw kadakuada ti Department of Interior and Local Government iti Seal of Good Local Governance.

Inawat ni Governor Ryan Singson ti pammadayaw para iti Provincial Government ken ni DILG Secretary Eduardo Año kabayatan ti naangay nga awarding ceremony sadiay Manila idi Nobiembre 7, 2018.

Kadua nga immawat ti agkabanuag a gobernador dagiti mayor ken pannakabagi dagiti dua a siudad ken siam nga ili ti Ilocos Sur iti pammadayaw. Napadayawan met dagiti LGU ti ili ti Caoayan, Salcedo, San Esteban, San Ildefonso, San Vicente, Santa, Santa Catalina, Santo Domingo ken Tagudin.

Kadua ti Ilocos Sur a napadayawan iti Region 1 ti Gobierno-Probinsial ti La Union ken Pangasinan. Napadayawan pay dagiti lima nga ili iti Ilocos Norte, pito nga ili iti La Union, ken pito nga ili iti Pangasinan.   Immawat pay ti pammadayaw ti San Fernando City iti La Union ken Alaminos City iti Pangasinan. Maibilang ti Region 1 kadagiti rehion iti intero a Pilipinas a kaaduan ti ili, siudad ken probinsia a napadayawan ita a 2018.

Kas ken ni Gov. Singson, maragsakan da Mayor Ericson Singson iti Candon City, Mayor Juan Carlo Medina ti Vigan City, ken dagiti amin a mayor dagiti siam nga ili iti Ilocos Sur iti pannakapadayaw dagiti imatonanda ta nabigbig ti napasnek a panagtrabaho ken panagkaykaysa dagiti opisial ken agserserbi kadagitoy a lokal a gobierno para ti epektibo a panagserbi kadagiti umili.

Tinawen a maisaysayangkat ti SGLG Award babaen ti DILG kas pammigbig kadagiti local government units iti intero a Pilipinas a nakaleppas ken nakatungpal kadagiti pagrukodan wenno standard nga inyetnag ti DILG iti pito a mangipakita iti Good Local Governance kas ti Financial Component, Social Component, Disaster Component, Peace and Order, Business Friendliness, Environment and Tourism components.

Saan laengen a mapadayawan iti umuna a gundaway ti Ilocos Sur ken dagiti dua a siudad, ken dadduma pay nga ili, ngem kaaduanna dagiti nabigbigen kadagiti nagkauna a tawen manipud idi nayusuat ti SGLG. Dakkel a karit dayta kadagiti opisial ti dadduma pay a lokal a gobierno iti Ilocos Sur a mangtungpal kadagiti pagrukodan nga inyetnag ti DILG tapno mapadayawandanto met iti SGLG kadagiti masanguanan a tawen. (Eden Alviar)

Photo: Awarding of the Seal of Good Local Governance at the Manila Hotel. (photo taken from official Facebook Page of Gov. Ryan Luis V. Singson)

, , , ,