Provincial scholars, inawatda alawansda para 1st semester

STA. MARIA, Ilocos Sur – Inawat dagiti scholar ti gobierno provincial ti Ilocos Sur nga agbasbasa kadagiti sumagmamano a pagadalan iti maikadua a distrito ti probinsia ti alawansda para iti umuna a semestre daytoy nga school year iti Ilocos Sur Polytechnic State College ditoy nga ili idi Nobiembre 11.

Immawat iti sagtunggal P3,000.00 kas alawansda dagiti 191 provincial scholars nga agbasbasa iti Ilocos Sur Polytechnic State College ditoy, University of the Philippines, Candon, ken iti Data Center.

Agdagup amin iti P573,000.00 ti naiwaras para iti alawans dagiti 191 provincial scholars iti maikadua a distrito.

Immun-una ngem daytoy, inawat dagiti 321 nga iskolar ti gobierno probinsial nga agbasbasa iti UNP Vigan City ti alawansda nga agdagup aminĀ  iti P963,000.00 idi Nobiembre 4.

Segun ken ni Rapanut, chair ti committee on education ti provincial board, nanayonan ti alawans dagiti scholars manipud iti P2,500 iti P3,000 babaen ti resolusion nga impasa ti provincial board a mangingato iti alawans nga awaten dagiti provincial scholars.

Kinuna ni Rapanut a daytoy ti immuna a pannakaingato ti alawans dagiti provincial scholars iti uneg ti lima a tawen.

Naammuan iti bokal nga adda pay nabati a P300,000.00 iti naiyalokar a pondo ket daytoy ti ipaunada nga ibayad iti udi ti gobierno probinsialĀ  iti UNP Vigan mainaig kadagiti iskolarna.

Agdagup iti P2 milion ti inaprobaran ti provincial board a para iti scholarship program ti gobierno probinsial.#