Prov’l Government rambakanna ti Legislative Awareness Week

VIGAN CITY — Rambakan ti Provincial Government ti Ilocos Sur ti Legislative Awareness Week (LAW) tapno maisaknap ti pannakaammo dagiti umili nangruna dagiti adda iti lehislatura ti kinapateg ti pannakaputar dagiti lokal a linteg para ti pagsayaatan dagiti siudad, ili ken intero a probinsia ti Ilocos Sur.

Dayta ti inrakurak ni Ilocos Sur Vice Governor Jeremias Singson kabayatan ti naangay a press conference iti Sangguniang Panlalawigan Session Hall, Provincial Capitol iti bigat ti Hulio 9, 2019.

Naipakaammo kabayatan ti press conference a sagudayen ti Provincial Ordinance No. 011-18, Series of 2018 a napauluan iti “An Ordinance Declaring the Second Week of July of Every Year as the Legislative Awareness Week of 9th Sangguniang Panlalawigan of the Province of Ilocos Sur” ket isu ti namunganayan ti makalawas a panagrambak idi Hulio 9–13, 2018. Ita a tawen naamendaran ti ordinansa ket nagbalinen ti pannakarambak ti LAW iti Hulio 14–19, 2019.

Nairakurak nga ita a tawen a pannakarambak ti LAW ket maangay dagiti nagduduma a gannuat para kadagiti agtutubo, community leaders, partner agencies, ken dadduma pay nga stakeholders kas dagiti seminar-workshop on legislation, mobile session, community engagement program, ken academic contests. Maigibus ti selebrasion babaen ti panangipaay ni Vice Gov. Singson iti State of the Legislative Department Address.

Marugian ti selebrasion babaen ti Nasantuan a Misa sadiay Christ the King Parish, Paing, Bantay, Ilocos Sur, iti alas-8 iti bigat ti Hulio 4, ken sarunuen ti Family Day and Team Building Activities sadiay Caniaw Heritage and Forest Park.

Iti Lunes, Hulio 15, ti 10th Sangguniang Panlalawigan ket idauluan ti Provincial Government ti Flag Raising Ceremony iti alas-8 iti bigat sadiay Provincial Capitol, a sarunuen ti parada dagiti kalesa nga agturong iti Plaza Maestro Convention Center, ken seminar-workshop dagiti high school ken college students iti nagduduma a pagadalan iti Ilocos Sur.

Maangay met inton Hulio 16 ti mobile session dagiti kameng ti Sangguniang Panlalawigan sadiay Narvacan National Central School, Narvacan, Ilocos Sur iti alas-2 iti malem a pagbuyaanto dagiti opisial ti Municipal Government, barangay officials, Department Heads of the LGU, ken school government students ti NNCHS tapno maamuanda dagiti parliamentary proceedings kabayatan ti session.

Inton Hulio 17, ti Sangguniang Panlalawigan ket makipaset iti Community Engagement Program sadiay Brgy. Dardarat, San Juan, Ilocos Sur iti alas-7 iti bigat, ken makikaysada iti panagmula iti mangrove, trash audit, ken panag-lecture kadagiti estudiante ken opisial ti Brgys. Dardarat, Solot-Solot, Surngit ken Camindoroan para ti pannakaitandudo ti green advocates and governance.

Inton Hulio 18, ti Sangguniang Panlalawigan ket mangisayangkat iti academic contests kadagiti public secondary high schools sadiay Provincial Capitol iti alas-8 iti bigat. Agsasalip dagiti eskuela iti Essay Writing, Poster-Making, Extemporaneous Speaking ken debate a pakaipaayan dagiti cash prizes, medalia ken sertipiko.

Inton Hulio 19, ni Vice Gov. Singson, Presiding Officer ti 10th Sangguniang Panlalawigan ket ipaayna ti 3rd Kakibin ti Balligi, the State of the Legislative Department Address sadiay Vigan Convention Center iti alas-4 iti malem. Manamnama ti pannakikaysa dagiti mayor, vice mayor ken Sangguniang Bayan members iti Ilocos Sur. Maitampok iti pasken ti pannakaiparuar ti SP Commemorative Stamp kas panangirugi ti 10th Sangguniang Panlalawigan ken rugi ti pannakarambak ti 30th year ti Local Government Code inton 2021.

Impaganetget ni Vice Gov. Singson a babaen ti pannakarambak ti LAW iti innem nga aldaw ket maipasagepsep kadagiti umili iti Ilocos Sur ken agindeg iti Kailokuan ti kinaserioso nga agserbi dagiti kameng ti 10th Sangguniang Panlalawigan ken ti Provincial Government ti Ilocos Sur iti panangidaulo ni Governor Ryan Singson para ti pagsayaatan ti probinsia. ●