Footer

Provl Officials: agmulmula iti tabako, madedehado iti tripartite meeting

VIGAN CITY – Linagidaw dagiti agmulmula iti tabako ti kapaliiwanda a nakurang ti  panangisakit kadakuada ti National Tobacco Administrasion bayat ti Tobacco Summit a naangay iti provincial capitol ditoy itay Oktubre 16.

Kangrunaan nga areng-eng dagiti timmabuno a mannalon ti bassit a maitutuon iti presio ti tabako iti baet a dumakdakkel ti mabusbosda iti inputs iti tinawen a maang-angay a tripartite meeting iti  nagbabaetan dagiti pannakabagi dagiti mannalon,  aggatgatang ken agparpartuat ken iti NTA.

Kadawyan a P1 laeng ti maitutuon iti presio ti tabako iti tripartite meeting.

Inangay ni Gov. Deogracias Victor “DV” Savellano ti tobacco summit kalpasan a naduktalanna iti panagpasiarna iti Hunan, China a P200 ti presio tunggal kilo ti Grade A a tabako ken P100 ti presio dagiti reject a tabako.

Kinumpirma met ni Dip. Eric Singson nga uray iti Malaysia, P200 tunggal kilo ti presio ti Grade A a tabako.

“Apay nga iti yantayo, nakababbaba (presio), iti sabali a nasion, nakangatngato?” kinuna ti gobernador.

Iti napalabas a panagtatabako, P55 laeng ti pinaggatang dagiti traders iti Grade A a tabako.

Maysa pay a nangiduron iti gobernador a mangayab iti tobacco summit ti kapaliiwanna a saan a ti pagsayaatan dagiti mannalon ti idurduron dagiti mangireprepresentar kadagiti  agmulmula iti tabako.

“Dagiti mangireprepresentar kadagiti farmers, once a nakatugawda iti tripartite, saanda a kitaen ti pagsayaatan dagiti mannalon,” kinuna ti gobernador.

“Ti kaso daytoy, isuda (NTA) ti agpili, saan nga aktual a mannalon ti agpili,” kinuna ni Savellano idinto a  linagidawna ti saan a panangibibiang ti nasao nga ahensia dagiti provincial officials idinto nga isuda ti kangrunaan nga asitgan dagiti mannalon no adda problemada.

Kabayatanna, kinuna met ni Vice Gov. Jeremias “Jerry” Singson a “madmadlaw a kasla madedehado ti biang dagiti mannalon” no maangay ti tripartite meeting.

“…agpayso man ken saan, saantayo a mababalaw dagiti mannalon no madlawanda a kasla nakurang ti suporta (da) ti  NTA ti namnamaen(da) a kadakkelan a mangkita ken mangsuporta kadakuada… Kasdiay ti pattapattada, ti paliiwda ket saantayo a mapabasol dagiti mannalon,” kinuna ni Singson.

Insingasing pay ti bise gobernador a ti koma maganansia dagiti tobacco manufacturers ti base iti pannakasuma iti presio ti tabako, saan laeng iti mabusbos iti produksion.

“Agsasabattayo a, saan laeng a daytay rukodenyo (agparpartuat) ti daydiay magasto ti mannalon ket ikkanyo idan iti bassit a maganansia,” kinuna ni Singson.

“Hopefully, napintas daytoy maaramid a tripartite iti 2007 ta adda mangiruangan ken mangisakit kadagiti mannalon,” innayon ti bise gobernador.

Kinuna ni Savellano a “masapul a makipartisipartayo, agpilitayo kadagiti representatives a mangisakit iti industria no kayattayo a dumur-as ti bukodtayo nga industria ti tabako.”

Iti kallabes, indagadag ni Savellano ti pannakaipasdek ti opisina ti NTA iti Ilocos Sur, saan a ti Manila, agsipud ta ditoy ti kadakkelan ti produksion iti tabako.#