Proyekto inprastruktura, nairingpas

CABUGAO, Ilocos Sur – Dua a proyekto a pinunduan ti Priority Development Assistance Fund ni Cong. Luis Ryan Singson ti naileppas ditoy nga ili itay nabiit.

Nalpasen ti flood control program iti Barangay Baclig ditoy nga ili ken ti multipurpose building iti Cabugao National High School, agpada a napunduan babaen ti PDAF ni Diputado Singson.

Napunduan ti flood control project iti P1 million idinto a P2 million ti naipundo iti 3-rooms a building iti nasao a pagadalan.

Kabayatanna, pagnanaaranen dagiti umili ti kaaduan a paset ti nasementon a kalsada ti Arnap-Carusipan.

Naammuan met a nasementon ti L. Siruno Street, iti Barangay Cuantacla, dalan a sumrek iti purok ken sumalpot iti kalsada a kumamang iti Cabugao river iti beddeng ti Barangay Carusipan a napunduan babaen ti bingay ti munisipio iti R.A. 7171.

Segun ken ni Barangay Captain ti Arnap Teodoro Tabula, addan paglintegan dagiti agnaed iti nasursurong a paset ken iti ballasiw ti karayan no mapanda iti ili.

Nagyaman dagiti opisial dagiti dua a barangay ken ni Mayor Edgardo S. Cobangbang, Jr.  ta nadardarasen ti panagibiaheda kadagiti apitda manipud iti lugarda agingga iti tiendaan ti ili.#