Proyekto para kadagiti ubbing, imbaskag ni Gob. DV

VIGAN CITY – Uppat a programa para kadagiti ubbing iti probinsia ti imbaskag ni Gov. Deogracias Victor “DV” Savellano bayat ti selebrasion   ti Provincial Children’s Month  itay Oktobre 23.

“Rumbeng a maipangruna dagiti ubbing ti probinsia,” kinuna ti gobernador.

Ditoy nga imbinsabinsa ti gobernador dagiti uppat  a programa ti probinsia para kadagiti ubbing:  ti comprehensive maternal and child care a mangitandudo iti salun-at ti ubing iti tian ti ina; ti expanded program on immunization nga agpanggep a mangpapigsa iti public health babaen ti pannakabakuna dagiti ubbing iti anti-measles, pannakaited ti Vitamin A ken pannakapurga;  ti improved environmental health, wenno ti pannakapaadda iti nadalus a mainum a danum ken pannakapaadda iti kasilia ti kada balay tapno maaddaan iti naan-anay a sanitasion ken malapdan dagiti saksakit kas iti cholera ken diarrhea; ken ti intensified nutrition program a mangipaay iti naan-anay a bitamina kas iti Iron, pannakaipaay ti supplemental feeding iti es-eskuela, kasta metten ti panangipaay iti information dissemination iti panagusar ti iodized salt.

Karaman pay ditoy ti pannakasanay dagiti barangay nutrition scholars ti probinsia a mangkitkita iti salun-at dagiti ubbing iti barbarangay.#